सर्वसामान्यांचे घराचे स्वप्न पूर्ण करण्यासाठी म्हाडा पुन्हा एकदा सज्ज झाला आहे. महाराष्ट्र गृहनिर्माण क्षेत्र विकास प्राधिकरण येत्या वर्षभरात मुंबईत ५,१९९ घरे बांधणार आहे. म्हाडाचे मुंबई बोर्ड नागरिकांना परवडणारी घरे उपलब्ध करून देण्यासाठी ५,७४९.४९ कोटी रूपये खर्च करणार आहे.

मुंबई तसेच ठाणे, कल्याण, डोंबिवली, मीरा रोड, विरार येथे घर घेण्याचे स्वप्न पाहणाऱ्यांसाठी कोकण मंडळाने २०२५-२०२६ मध्ये ९,९०२ घरे बांधण्याची योजना आखली आहे. ही घरे बांधण्यासाठी कोकण मंडळाकडून १४०.८५ कोटी रूपये खर्च केले जाणार आहे.

नाशिक, पुणे, संभाजी नगर, नागपूर येथेही घरे बांधली जाणार

म्हाडाने अर्थसंकल्पात राज्यभरात १९,४९७ घरे बांधण्याची योजना आखली आहे. मुंबई आणि कोकण मंडळासोबतच, म्हाडाने नाशिक, पुणे, छत्रपती संभाजी नगर आणि नागपूर येथे घरे बांधण्याची योजना आखली आहे. याचा फायदा नक्कीच सर्वसामांन्याना होईल.

मुंबईतील विविध प्रकल्पांसाठी मिळणार निधी

मुंबई मंडळाचे अनेक प्रकल्प सुरू आहेत. अर्थसंकल्पातून सर्व प्रकल्पांची गती वाढवण्याचा प्रयत्न करण्यात आला आहे. मुंबई मंडळाला मिळालेल्या एकूण रकमेपैकी सर्वाधिक रक्कम मुंबईतील १०० वर्षे जुन्या बीडीडी चाळींच्या पुनर्विकासाठी देण्यात आली आहे. बीडीडी चाळ पुनर्विकास प्रकल्पासाठी अर्थसंकल्पात २,८०० कोटी रूपयांची तरतूद करण्यात आली आहे.

तर, जोगेश्वरी पूर्वेतील पीएमजीपी कॉलनी प्रकल्पासाठी ३५० रूपये, वांद्रे पश्चिमेतील परिधान खाडी पुनर्विकास प्रकल्पासाठी २०५ कोटी रूपये, गोरेगाव येथील सिद्धार्थ नगर येथे घरे बांधण्यासाठी ५७३ कोटी रूपये, परळमधील जिजामाता नगर भूखंडात मुला- मुलींसाठी वसतिगृहे बांधण्यासाठी २० कोटी रूपये, गिरणी कामगारांसाठी घरे बांधण्यासाठी ५७.५० कोटी रूपये देण्यात आले आहे.

बोरिवली सर्वेक्षण क्रमांक १६० योजनेसाठी २०० कोटी रूपये, संजय गांधी राष्ट्रीय उद्यान पुनर्विकास प्रकल्पासाठी २०० कोटी रूपये, गोरेगाव प्रकल्पासाठी ५० कोटी रूपये, मागाठाणे बोरिवली योजनेसाठी ८५ कोटी रूपये आणि गोरेगाव सिद्धार्थ नगर (पत्राचाळ) पुनर्विकास प्रकल्पासाठी २० कोटी रूपये देण्यात आले आहे.