Medicines : राज्यात मधुमेह, रक्तदाब, कर्करोग अशा गंभीर आजारांवर नागरिकांना योग्य आणि तातडीने औषधपुरवठा करता यावा यासाठी तामिळनाडू पॅटर्न राबवण्याचा निर्णय घेण्यात आला. त्यावर "महाराष्ट्र वैद्यकीय सेवा महामंडळ " प्रस्तावित करण्यात आले. मात्र अद्यापही अनेक रुग्णांना वेळेवर औषध मिळत नाहीये. (Latest Marathi News)

राज्यात रुग्णालयांमध्ये २०१७ पूर्वी प्रत्येक विभागामार्फत औषधे, उपकरणे व यंत्रसामग्री खरेदी केली जात होती. प्रत्येक विभागामार्फत स्वतंत्र खरेदी केल्याने वेगवेगळ्या दराने औषधे खरेदी करावी लागत होती. उच्च न्यायालयाच्या निर्देशानुसार या दरांमध्ये एकसूत्रता येण्यासाठी हाफकीन जीव औषध महामंडळ निर्माण करण्यात आले.

सर्व प्रकारची औषधे व उपकरणे खरेदी तसेच सेवा उपलब्ध करून घेण्यासाठी आणि पुरवठा पद्धती अधिक गतिमान तसेच सुरळीत करण्यासाठी तामिळनाडू पॅटर्न राबवण्याचा निर्णय झाला. त्यानुसार तामिळनाडू राज्यातील वैद्यकीय सेवा महामंडळाचा अभ्यास दौरा झाला. दौऱ्यानंतर सार्वजनिक आरोग्य विभागाच्या अधिपत्याखाली स्वतंत्र "महाराष्ट्र वैद्यकीय सेवा महामंडळ " स्थापन करण्याचे प्रस्तावित करण्यात आले.

मात्र सरकार स्तरावर वेळकाढूपणा सुरु असल्याने औषध खरेदीत दिरंगाई होते आहे. याउलट ज्या पुरवठादारांनी औषध पुरवठा केला आहे, त्यांचीही देयके शासन स्तरावर अडकून पडली आहेत. परिणामी राज्यातील रुग्णालयात मधुमेह, रक्तदाब, कर्करोग अशा जीवघेण्या आजारांच्या औषधांचा तुटवडा निर्माण झाला आहे.