मावळ : मित्रांसोबत नदीवर पोहण्यासाठी गेला असता तरुण नदीत बुडाला असल्याची घटना देहूरोड येथे घडली आहे. या घटनेत सदर तरुणाचा मृत्यू झाल्याची दुर्दैवी घटना घडली आहे. घटनेनंतर वन्यजीव संरक्षण संस्थेच्या वतीने तीन तास तपास करत मृतदेह बाहेर काढण्यात आला. या घटनेने हळहळ व्यक्त केली जात आहे. 

मावळच्या देहुरोड थॉमस कॉलनी येथील रोहन रॉय (वय २०) असे मृत झालेल्या तरुणाचे नाव आहे. देहूरोड परिसरातील रहिवासी असलेले तीन मित्र असलेले तरुण मुले सहावारी दुपारी एक वाजताच्या सुमारास गंहुजे येथील पवना नदी ठिकाणी पोहण्यासाठी गेले होते. त्यांच्या सोबत याच भागात राहणारा वीस वर्षाय रोहन रॉय हा देखील होता. तिघे मित्र नदीत पोहण्यासाठी उतरले होते. पोहत असताना नदीच्या मधोमध गेले. 

पोहता पोहता पाण्यात बुडाला 

मात्र पाण्यात पोहत असताना नदी पात्रातील खोलीचा अंदाज न आल्याने पोहता पोहता अचानक रोहन दिसेनासा झाला. सोबत असलेल्या मित्रांनी त्याला शोधण्याचा प्रयत्न केला. परंतु तो मिळून आला नाही. या घटनेची माहिती शिरगाव परदंवडी पोलिस ठाणे तसेच वन्यजिव संरक्षण संस्था यांना देण्यात आली. यानंतर पोलीस पथकासह पवना नदीच्या ठिकाणी दाखल होत शोधकार्य सुरु केला. 

तीन तासाच्या प्रयत्नानंतर मृतदेह काढला बाहेर 

शोध पथकाने घटनास्थळावर दाखल होत तब्बल तीन तास प्रयत्न करून रोहनचा मृतदेह पाण्याबाहेर काढला. यानंतर शिरगाव पोलिसांच्या मदतीने मृतदेह पिंपरी येथील वायसीएम रुग्णालयात पाठविण्यात आला. या प्रकरणी परंदवाडी पोलीस अधिक तपास करीत आहे. दरम्यान घटनेची माहिती कुटुंबीयाना मिळाल्यानंतर कुटूंबियांनी एकच आक्रोश केला.