मावळ : मावळ तालुक्यातील मंगरुळ येथे बेकायदेशीर गौण खनिज उत्खनन प्रकरणी महसूल प्रशासनाने मोठी कारवाई  कारवाईत एकूण पंचवीस वाहने जप्त केली आहेत. तसेच या प्रकरणी तळेगाव एमआयडीसी पोलीस ठाण्यात गुन्हा दाखल करण्याची प्रक्रिया सुरू असून लवकरच संबंधितांवर कठोर कारवाई होणार असल्याची माहिती प्रशासनाने दिली आहे. दरम्यान या कारवाईमुळे गौण खनिज उत्खनन करणाऱ्यांचे धाबे दणाणले आहे. 

मावळच्या मंगरूळ परिसरात मोठ्या प्रमाणात गौण खनिज उत्खनन सुरु होते. अर्थात महसूल विभागाकडे भरण्यात येत असलेली रॉयल्टी न भरताच अनधिकृतपणे गौण खनिज उत्खनन करण्यात येत होते. याबाबत काही तक्रारी दाखल होत्या. तसेच  या प्रकरणात आमदार सुनील शेळके यांनी राज्य विधानसभेत लक्षवेधी सूचना मांडत मोठ्या प्रमाणावर अवैध उत्खनन आणि वृक्षतोड झाल्याचा आरोप केला होता. त्यांनी संबंधित अधिकाऱ्यांवर कारवाई करण्याची मागणी केली होती. 

पोकलेन मशीनसह डंपर जप्त 

यासंदर्भात डिसेंबर २०२४ मध्ये अवैध वृक्षतोड व उत्खनन उघडकीस आले असून आठशे ते नऊशे झाडांची तोड व सुमारे चाळीस ते पंचेचाळीस हजार ब्रास माती, मुरूम आणि डबरचे उत्खनन झाल्याची माहिती समोर आली होती. त्यानुसार महसूल विभागाकडून कारवाई करण्यात आली आहे. यात २५ वाहने जप्त करण्यात आली आहेत. यात अकरा पोकलेन मशीन, मुरमाने भरलेले चार डंपर व रिकामे दहा डंपर यांचा समावेश आहे. 

अहवाल आल्यानंतर दंडात्मक कारवाई 
दरम्यान गट क्रमांक ४१ व ४२ हे वनक्षेत्रात मोडत असूनही त्याठिकाणी उत्खनन झाल्याचे निदर्शनास आले आहे. याच पार्श्वभूमीवर वन खात्याच्याही चौकशीला सुरुवात झाली आहे. तहसीलदार विक्रम देशमुख यांनी पत्रकारांशी बोलताना सांगितले की, गौण खनिज उत्खननाबाबत येत्या तीन- चार दिवसांत सविस्तर अहवाल मिळणार असून त्यानंतर महसूल कायद्यानुसार तातडीने दंडात्मक कारवाई केली जाईल.