मनोज तांबे,साम टीव्ही

चंद्रपूर जिल्ह्यातील मतदार यादीच्या घोटाळ्यानंतर पालघरमधील घोळ उघडकीस आला आहे. चंद्रपुरात एकाच घरात 119 मतदार दाखवल्याचा प्रकार ताजा असताना पालघरमध्ये एका महिलेचं मतदार यादीत 63 वेळा नाव समोर आलं आहे. माजी आमदार हितेंद्र ठाकूर यांनी हा गंभीर आरोप केला आहे.

नालासोपारा विधानसभा निवडणुकीच्या मतदार यादीमध्ये सुषमा गुप्ता असे या महिलेचे सहा वेळा नाव आले असले, तरी वसई विरारमध्ये एकाच व्यक्तीचे तब्बल 63 वेळा नाव वेगवेगळ्या ठिकाणी आले आहेत, असा गंभीर आरोप माजी आमदार हितेंद्र ठाकूर यांनी केला आहे.

वसई विरारमध्ये पूजा सिंग या महिलेचे ६३ वेळा नाव आलं आहे. तर अभिषेक सिंग नावाच्या व्यक्तीचे ४७ वेळा नाव आले आहे. तर सुनील यादव याचे ५३ वेळा नाव आले आहेत. या लोकांची नावे कुठून आली, याबाबत माजी आमदार हितेंद्र ठाकूर यांनी निवडणूक आयोगावर टीका केली.

चंद्रपूर एकाच घरात दाखवले 119 मतदार

चंद्रपुरातील घुग्गुस गावात एकाच घरात 119 मतदारांची नोंद सापडली. परंतु या घरी केवळ दोन मतदार आहेत. घुग्गुस हे ग्रामपंचायत असलेलं औद्योगिक गाव असून सचिन बांदुरकर यांचे 350 क्रमांकाचे घर आहे. या घरातून तब्बल 119 जणांची नोंदणी झाली आहे.

एका लहानशा घरात एवढ्या मतदारांची नोंद कशी काय करण्यात आली, हा मोठा प्रश्न निर्माण झालाय. काँग्रेसच्या स्थानिक पदाधिकाऱ्यांनी आयोगाच्या यादीनुसार तपासणी केल्यानंतर घोटाळा समोर आला. या घोटाळ्यामुळे मोठी खळबळ उडाली आहे.