Maratha reservation leader Manoj Jarange Patil : मराठा आरक्षणासाठी पुन्हा एकदा मनोज जरांगे पाटील यांनी एल्गार पुकारलाय. बुधवारी मनोज जरांगे पाटील मुंबईसाठी अंतरवाली सराटीमधून रवाना होणार आहे. २९ ऑगस्टपासून मनोज जरांगे पाटील मुंबईमध्ये मराठा आरक्षणासाठी बेमुदत आंदोलन करणार आहेत. सोमवारी जरांगे पाटलांनी सरकारला दोन दिवसांची मुदत देत थेट इशारा दिला होता. राज्य सरकारकडूनही मनोज जरांगे पाटील यांच्या आंदोलनाची नोंद घेण्यात आली आहे. जरांगे पाटलांसोबत चर्चा करण्यासाठी मुख्यमंत्री देवेंद्र फडणवीस यांचे ओएसडी थेट अंतरवाली सराटीमध्ये दाखल झाले आहेत.

मुख्यमंत्री देवेंद्र फडणवीस यांचे ओएसडी आज सकाळी आंतरावली सराटी येथे मनोज जरांगे पाटील यांची भेट घेण्यासाठी दाखल झाले होते. ओएसडी राजेंद्र साबळे यांनी मनोज जरांगे पाटील यांची भेट घेतली. त्यांनी जरांगे पाटलांना मुंबई आंदोलनावर चर्चा करून मागे घेण्यासाठी विनंती केल्याची माहिती मिळाली आहे. ओएसडीच्या विनंतीवर मनोज जरांगे पाटील काय भूमिका घेणार? याकडे राज्याचे लक्ष लागले आहे.

गणेशोत्सव आणि मुंबईतील गर्दी, पाऊस पाहता मनोज जरांगे पाटील यांनी आपले आंदोलन मागे घ्यावे, अशी मागणी ओसडी साबळे यांनी केल्याची माहिती समोर आली आहे. दुसरीकडे मनोज जरांगे पाटील मराठा आरक्षणावर ठाम आहेत. मागण्या मान्य करा, आम्ही आंदोलन करणार नाही, अशी भूमिका मनोज जरांगे पाटील यांनी घेतली आहे.

मुंबईपर्यंत आम्हाला सरकारने एक रस्ता आम्हाला द्यावा. आंदोलन आता माघारी घेणार नाही. ओएसडीकडून आंदोलन पुढे ढकलण्याबाबत विनंती करण्यात आल्याचेही समजतेय. पण मनोज जरांगे पाटील आपल्या आंदोलनावर ठाम आहेत. मला कुणालाही त्रास द्यायचा नाही, मला माझ्या मराठी माय-लेकारांसाठी आरक्षण हवे आहे. सरकारने आरक्षण द्यावे, अशी मागणी जरांगे पाटलांनी केली. आंदोलनाची तारीख कोणत्याही परिस्थितीत बदलली जाणार नाही, उद्या मुंबईकडे कोणत्याही परिस्थिती निघणारच, असे जरांगे म्हणाले. दुसरीकडे मुख्यमंत्र्यांचे ओएसडी साबळे म्हणाले की, जरांगे पाटील यांच्या आंदोलनाचा मार्ग जाणून घ्यायला आम्ही आलो आहेत.