Manoj Jarange ₹500 crore allegation : उपमुख्यमंत्री एकनाथ शिंदे, खासदार श्रीकांत शिंदे आणि भाजपच्या नेत्यांमध्ये माझ्या नावाने ५०० कोटी रुपयांचा मोठा व्यवहार आणि कट शिजल्याचा घणाघाती आरोप मनोज जरांगे यांनी केला आहे. ते नारायण गडावरील दसरा मेळाव्यात बोलत होते. (Manoj Jarange questions Eknath Shinde)

जरांगे म्हणाले की, "गेल्या तीन वर्षांत माझ्या जवळच्या किंवा लांबच्या लोकांनी कोणाकडून पैसे घेतल्याची माहिती माझ्या कानावर आली आहे. पण मला भेटण्यासाठी कोणालाही पैसे देण्याची गरज नाही. ज्यांनी दिले असतील त्यांनी ते परत घ्यावेत."

५०० कोटींच्या व्यवहारावरून शिंदेंना प्रश्न

उपोषणाच्या आठव्या-नवव्या दिवशी मला एक अत्यंत भयंकर गोष्ट कळाली, असा दावा करत जरांगे यांनी थेट एकनाथ शिंदे यांना उत्तर देण्याचे आव्हान दिले. जरांगे म्हणाले, "शिंदे साहेब, तुम्ही भाजपच्या नेत्यांना असे सांगितले आहे का की मनोज जरांगेंना ५०० कोटी रुपये द्यायचे आहेत? आणि भाजपकडून ५०० कोटी रुपये घेऊन ते मला दिले असे तुम्ही भाजपला सांगितले का?" असा सवाल जरांगे पाटील यांनी शिदेंना विचारला.

श्रीकांत शिंदेंचे नाव अन् भाजपचा कट

पुढे बोलताना जरांगे म्हणाले, "एकनाथ शिंदे यांनी भाजपकडून ५०० कोटी रुपये घेतले आणि त्यांचे पुत्र श्रीकांत शिंदे यांनी ते पैसे माझ्यापर्यंत पोहोच केले, अशी चर्चा सुरू आहे. जर तुम्ही भाजपकडून खोटं सांगून ५०० कोटी रुपये आणले असतील, तर याचे उत्तर उद्या संध्याकाळपर्यंत द्या. हा खूप मोठा कट आहे आणि याचा पुरावा समोर आला तर पायाखालची माती सरकेल!"

मुंबईवर पुन्हा धडकण्याचा इशारा

"भाजप शिंदे साहेबांना संपवत आहे की मला, याचा फैसला झालाच पाहिजे. आरक्षणाच्या मारेकऱ्यांच्या दारात कटोरा घेऊन उभे राहायचे नाही," असे सांगत जरांगे यांनी कार्यकर्त्यांना इशारा दिला की, दुष्काळाची परिस्थिती बिकट झाली नाही, तर सर्वांनी पुन्हा मुंबईच्या दिशेने जाण्याची तयारी ठेवावी. तसेच आमच्याविरोधात बोलणाऱ्यांनी मर्यादेत राहावे, अन्यथा जशास तसे उत्तर दिले जाईल, असा थेट इशाराही त्यांनी दिला.