अजय सोनावणे, साम टीव्ही, प्रतिनिधी

Nashik Malegaon : नाशिकच्या मालेगाव येथून एक धक्कादायक घटना उघडकीस आली आहे. मालेगावमधील एका उड्डाण पुलावरुन एका तरुणाने उडी मारल्याची घटना समोर आली आहे. या घटनेचा थरारक व्हिडीओ सोशल मीडियावर व्हायरल झाला आहे. ही घटना मालेगावमधील नवीन बस स्थानकाजवळ ही घटना घडली आहे.

मिळालेल्या माहितीनुसार, उड्डाण पुलावरुन खाली उडी मारणारा तरुण हा मूळचा बिहारमधला असल्याची माहिती समोर आली आहे. तो बिहारहून मालेगावमध्ये कामाच्या निमित्ताने आला. तो मालेगाव येथे गवंडी मजुरी करण्याचे काम करतो. त्याला काहीजण त्रास देत होते. या त्रासाला कंटाळून त्याने हे टोकाचे पाऊल उचलल्याचे म्हटले जात आहे.

व्हायरल व्हिडीओमध्ये तरुणाने उड्डाण पुलावरुन चढून उडी मारल्याचे पाहायला मिळते. त्यावेळी रस्त्यावर रहदारी देखील होती. उडी मारल्यानंतर तो खाली रस्त्यावर आदळला. सुदैवाने यात फक्त त्याच्या हाताला आणि कमरेला मार लागला. आसपासच्या लोकांनी या तरुणाला मालेगावच्या शासकीय रुग्णालयामध्ये उपचारासाठी दाखल केले आहे.

नाशिक जिल्ह्यातील मालेगावच्या नवीन बस स्थानकाजवळच्या उड्डाण पुलावरुन एका तरुणाने उडी मारली. त्याने आत्महत्या करण्याच्या प्रयत्नात उड्डाण पुलावरुन उडी मारल्याचे म्हटले जात आहे. उड्डाण पुलावर चालत जाऊन तेथून तरुणाने खाली उडी मारली. या घटनेच्या व्हिडीओची सध्या सर्वत्र चर्चा पाहायला मिळत आहे.