मालेगाव महापालिकेत मोठा राजकीय ट्विस्ट निर्माण झाला आहे. या महापालिकेत भाजपने अचानक माघार घेतली आहे. भाजपच्या दोन्ही नगरसेवकांनी काँग्रेससोबतचा गट रद्द केलाय. विभागीय आयुक्त कार्यालयातील गट नोंदणी अर्ज रद्द करण्यात आला आहे. गट रद्द करण्यासाठी अधिकृत अर्ज दाखल करण्यात आला आहे. काँग्रेस–भाजप एकत्र आल्याने जिल्हा आणि राज्यभरात मोठी चर्चा झाली होती.

मालेगावात कट्टर विरोधक एकत्र आल्याने राजकीय वर्तुळात आश्चर्य व्यक्त केले जात होते. काँग्रेससोबत भाजपच्या दोन्ही नगरसेवकांनी ‘भारत विकास आघाडी’ गट स्थापन केला होता. भाजपच्या निर्णय बदलल्याने मालेगावच्या राजकारणात पुन्हा एकदा खळबळ उडाली आहे.

मालेगावच्या राजकारणाची सर्वत्र चर्चा

मालेगाव महापालिकेच्या महापौरपदाच्या निवडीसाठी प्रक्रिया सुरू झाली आहे. या महापौरपदाच्या निवडणुकीत काँग्रेस आणि भाजपच्या नगरसेवकांनी हात मिळवणी केली होती. मालेगावातील 'इस्लाम' पक्षाला रोखण्यासाठी दोन्ही कट्टर विरोधक एकत्र आले होते. मालेगावत भाजपचे दोन तर काँग्रेसचे तीन उमेदवार जिंकले आहेत. भाजप आणि काँग्रेसने मिळून भारत विकास आघाडीची स्थापना केली होती.

मालेगाव महापालिकेत एकूण ८४ सदस्य संख्या आहे. परंतु कोणत्याही पक्षाने बहुमत मिळवलेलं नाही. मालेगावात इस्लाम पक्षाचे ३५ नगरसेवक निवडून आले आहेत. भाजप आणि काँग्रेसचे एकूण ५ नगरसेवक होते. दोन्ही पक्षाची मालेगावात महत्वाची भूमिका राहणार आहे. महाराष्ट्रात मुस्लिमांची संख्या १२ टक्के इतकी आहे. तर मालेगावात ७८ टक्के मुस्लिम आहेत. भारतात मुस्लिम समुदायांचा कल काँग्रेसकडे अधिक झुकतो. परंतु मालेगावात चित्र बदलले दिसून आले. मालेगावात 'इस्लाम' पक्ष गेमचेंजर ठरला आहे.