आगामी स्थानिक स्वराज्य संस्थांच्या निवडणुकीच्या पार्श्वभूमीवर नांदेडमधील राजकारण तापलंय. नांदेडमध्ये काँग्रेस पक्षात मोठी इनकमिंग होणार आहे. तर, राष्ट्रवादी काँग्रेस अजित पवार गटाला मोठा धक्का बसणार आहे. राष्ट्रवादी दिव्यांग सेलचे कार्याध्यक्ष रामदास पाटील यांनी राजीनामा दिला आहे. त्यांनी काँग्रेससोबत जाण्याचा निर्णय घेतलाय.

सर्वोच्च न्यायालयाने दिलेल्या आदेशानंतर स्थानिक स्वराज्य संस्थांच्या निवडणुका लवकरच पार पडतील. जानेवारी अखेरपर्यंत या निवडणुका पार पडतील. याच पार्श्वभूमीवर प्रत्येक पक्षाने कंबर कसली आहे. नांदेडमध्ये मात्र मोठी राजकीय उलथापालथ झाली असल्याचं पाहायला मिळत आहे.

नांदेडच्या देगलुर मतदारसंघात राष्ट्रवादी काँग्रेस अजित पवार गटाला धक्का बसणार आहे. राष्ट्रवादी दिव्यांग सेलचे कार्याध्यक्ष रामदास पाटील यांनी पक्षाला सोडचिठ्ठी दिली आहे. पाटील यांनी काँग्रेसमध्ये पक्षप्रवेश करण्याचा निर्णय घेतला आहे. आज राज्याचे उपमुख्यमंत्री अजित पवार यांच्या उपस्थितीत देगलूरमध्ये पक्षप्रवेश सोहळा पार पडणार आहे.

एकीकडे पक्षप्रवेश सोहळा पार पडत असताना, दुसरीकडे अजित पवार गटातील काही सदस्यांनी पक्षाला सोडचिठ्ठी दिली. रामदास पाटील यांच्यासह १८ माजी नगरसेवक, ३ माजी नगराध्यक्ष, २ माजी जिल्हा परिषद सदस्यांनी राष्ट्रवादी पक्षाला जय महाराष्ट्र केलं आहे. लवकरच त्यांचा काँग्रेस पक्षात पक्षप्रवेश सोहळा पार पडेल.

आगामी स्थानिक स्वराज्य संस्थांच्या निवडणुकांच्या पार्श्वभूमीवर राष्ट्रवादी काँग्रेस अजित पवार गटाला हा मोठा धक्का मानला जात असून, काँग्रेस पक्षाचं बळ अधिक वाढलं आहे.