नागपूर : राज्यातील मराठवाडा आणि विदर्भ या भागातील सर्व महत्त्वाच्या विषयांवर चर्चा करण्यास सरकार तयार आहे. राज्यातील लोकांसाठी राबवण्यात येणाऱ्या लोककल्याणकारी योजनांसाठी निधी कमी पडू दिला जाणार नाही, अशी ग्वाही देत मुख्यमंत्री फडणवीस यांनी दिली. यावेळी त्यांनी अधिवेशन जनतेच्या आशा आकांक्षा पूर्ण करणारे ठरेल, असा विश्वास त्यांनी व्यक्त केला.

हिवाळी अधिवेशनाच्या पार्श्वभूमीवर झालेल्या मंत्रिमंडळ बैठकीनंतर रामगिरी या शासकीय निवासस्थानी मुख्यमंत्री देवेंद्र फडणवीस यांनी माध्यमांशी संवाद साधला. यावेळी फडणवीस पुढे म्हणाले, 'महाराष्ट्राची अर्थव्यवस्था देशातील मोठ्या राज्यांमध्ये अग्रेसर असणारी अर्थव्यवस्था आहे. राज्यात पुरामुळे नुकसानग्रस्त झालेल्या ९० लाखांहून अधिक शेतकऱ्यांना मदत देण्यात येईल. केवायसी या प्रक्रियेमुळे राहिलेल्या उर्वरित शेतकऱ्यांनाही लवकरच मदत दिली जाईल. अतिरिक्त १० हजार रुपयांची मदत तसेच खरडून गेलेल्या जमिनी, विहिरी आदींसाठी स्वतंत्र मदत दिल्याची माहितीही फडणवीसांनी दिली.

शनिवार आणि रविवार सुटीच्या दिवशीही कामकाज करण्यात येणार आहे. या अधिवेशनात दररोज १० तासांहून अधिक कामकाज करण्याचा शासनाचा प्रयत्न राहणार आहे. या अधिवेशनात १८ विधेयके मांडली जाणार आहेत. विदर्भ आणि मराठवाड्याशी संबंधित अधिकाधिक प्रश्नांवर चर्चा होईल, असेही मुख्यमंत्री फडणवीसांनी स्पष्ट केले. दावोससह विविध मंचांवर झालेले गुंतवणूक करार मोठ्या प्रमाणावर प्रत्यक्षात येत आहेत. हे उद्योग महाराष्ट्रात येत असल्याचेही त्यांनी सांगितले.

नागरिकांचे प्रश्न सोडवणे हाच शासनाचा अजेंडा -उपमुख्यमंत्री शिंदे

एकनाथ शिंदे म्हणाले, 'महायुती सरकारने लोकाभिमुख आणि कल्याणकारी निर्णय घेतलेत. या अधिवेशनात विदर्भ आणि मराठवाड्याच्या प्रश्नांवर प्राधान्याने चर्चा करण्यात येणार आहे. नागरिकांचे प्रश्न सोडवणे हाच शासनाचा अजेंडा असणार आहे. विदर्भ, मराठवाड्यातील शेती, सिंचन, आरोग्य, रोजगार निर्माण या महत्त्वाच्या विषयांवर चर्चा करण्यात येईल'.