Parbhani News :

वीज चोरी, वीज गळती व वाढणारी थकबाकी कमी करण्यासाठी वीज वितरण कंपनीच्या (mahavitran) वतीने आता मोबाइलप्रमाणे वीज सेवासुद्धा प्रीपेड व पोस्टपेड करण्यात येणार आहे. त्यासाठी आता प्रत्येक घरी जुने मीटर हटवून स्मार्ट मीटर लावले जाणार आहेत. (Maharashtra News)

प्रीपेड मीटरमध्ये पैसे संपले की वीजपुरवठा खंडित केला जाईल. रिचार्ज केल्यावर परत वीज सेवा सुरळीत होईल, अशी योजना महावितरण कंपनीची आहे. यामुळे वीज चाेरी देखील थांबेल असा विश्वास महावितरणला आहे.

जिल्ह्याला वीज पुरवठा करताना महावितरण कंपनीला सर्वसाधारणपणे महिन्याकाठी 180 मिलियन यूनिट (एमयूएस) लागते. जिल्ह्यातील 445 फीडरवरून वीज ग्राहकांना वीज पुरवठा करण्यात येतो. मात्र, 145 फीडरवर मोठ्या प्रमाणात गळती होत असल्याने महावितरणच्या वीज समस्या सुविधांना अडचणींचा सामना करावा लागत आहे.

त्यातच शहरात ग्राहक मीटरमध्ये वेगवेगळे गैरप्रकार करून वीज चोरण्याचा प्रयत्न करत आहेत. तर ग्रामीण भागामध्ये आकडा टाकून सर्रास वीज चोरी केली जाते. या सर्व प्रकारावर कारवाई करण्यासाठी महावितरणची यंत्रणा तोकडी पडत असल्याने जिल्ह्यात 50 टक्के अधिक वीज चोरी होते. त्यामुळे या सर्व प्रकाराला आळा घालण्यासाठी वीज वितरण कंपनीच्या वतीने मोबाइलप्रमाणे वीज सेवासुद्धा प्रीपेड व पोस्टपेड करण्यात येणार आहे.

परभणी जिल्ह्यात 2 लाख 16 हजार 114 घरी प्रीपेड मीटर बसविले जाणार आहेत. परभणी जिल्ह्यात 1 लाख 21हजार 255 घरगुती, 7 हजार 376 वाणिज्य, 1 हजार 993 औद्योगिक यासह 96 हजार 793 कृषी पंपधारकांना जिल्ह्यात वीज पुरवठा केला जातो अशी माहिती महावितरणने दिली.

Edited By : Siddharth Latkar