Maharashtra Weather Forecast : मान्सूनने संपूर्ण महाराष्ट्र व्यापला आहे, पण मागील चार दिवसांपासून वाटचाल सध्या काहीशी संथ सुरू आहे. पुढील ३ ते ४ दिवसांत मान्सूम गुजरात, मध्य प्रदेश, छत्तीसगड, झारखंड, बिहार आणि उत्तर प्रदेशच्या दिशेने वेगाने पुढे सरकण्यासाठी अनुकूल वातावरण तयार झाले आहे. सध्या मॉन्सूनची सीमा सुरत, इंदूर आणि मोतिहारी या भागातून जात आहे. दरम्यान, आज राज्यातील विविध भागांत वादळी वाऱ्यासह पावसाची शक्यता हवामान विभागाने वर्तवली आहे.

विदर्भातील चंद्रपूर आणि गडचिरोली जिल्ह्यांत आज मुसळधार पावसाचा 'ऑरेंज अलर्ट' देण्यात आला असून, येथे विजांच्या कडकडाटासह जोरदार पाऊस होऊ शकतो. तर अकोला, अमरावती, भंडारा, बुलढाणा, गोंदिया, नागपूर, वर्धा, वाशिम आणि यवतमाळ या जिल्ह्यांमध्ये वादळी पावसाचा 'येलो अलर्ट' जारी करण्यात आला आहे.

कोकण किनारपट्टीवरही आज पावसाचा जोर पाहायला मिळेल. मुंबई, ठाणे, रायगड आणि रत्नागिरी जिल्ह्यांत वादळी पावसाचा अंदाज असल्याने येथे 'येलो अलर्ट' देण्यात आला आहे. तर पालघर आणि सिंधुदुर्ग जिल्ह्यांत काही ठिकाणी पावसाच्या हलक्या सरी कोसळू शकतात. याशिवाय, मध्य महाराष्ट्रात काही ठिकाणी जोरदार पावसाचा इशारा आहे, तर मराठवाड्यात आज तुरळक ठिकाणी मध्यम स्वरूपाच्या पावसाची शक्यता हवामानशास्त्र विभागाने वर्तवली आहे.

जोरदार पावसाचा इशारा (येलो अलर्ट) :

रायगड, रत्नागिरी.

विजांसह वादळी पावसाचा इशारा (येलो अलर्ट) :

पालघर, ठाणे, मुंबई, नाशिक घाटमाथा, पुणे, अहिल्यानगर, सातारा, छत्रपती संभाजीनगर, जालना, बीड, धाराशिव, लातूर, परभणी, नांदेड, बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.