भरत नागणे, साम टीव्ही, प्रतिनिधी

Maharashtra : सांगोल्यामध्ये शेतकरी कामगार पक्षातील शेकडो कार्यकर्त्यांनी आज (१० ऑक्टोबर) भारतीय जनता पक्षामध्ये प्रवेश केला. या पक्षप्रवेशाच्या कार्यक्रमाला मंत्री जयकुमार गोरे उपस्थित होते. पुढच्या काही दिवसात सोलापूरमध्ये मोठे भाजप पक्ष प्रवेश होणार असल्याचे संकेत जयकुमार गोरे यांनी दिले. त्यांच्या वक्तव्यामुळे भाजपमध्ये लवकरच मोठ्या प्रमाणात इनकमिंग होणार असल्याची चर्चा रंगली आहे.

सोलापूर जिल्ह्यातील माढा, करमाळा, सांगोला आणि सोलापूर शहरात येत्या २० दिवसात मोठे भाजप पक्ष प्रवेश होणार आहेत. सांगोला येथील पक्ष प्रवेश हा फक्त ट्रेलर आहे, अशा शब्दात राज्याचे ग्रामविकास मंत्री जयकुमार गोरे यांनी सोलापूर जिल्ह्यातील निवडणुकांची एकप्रकारे तयारीच सुरू केल्याचे संकेत दिले आहेत.

आगामी स्वराज्य संस्थांच्या निवडणूका येत्या काही महिन्यांमध्ये होणार आहेत. जानेवारी २०२६ पर्यंत निवडणूका पार पाडण्याचे आदेश सर्वोच्च न्यायालयाने राज्य निवडणूक आगोयाला दिले आहेत. निवडणूकाच्या पार्श्वभूमीवर राज्यात महायुतीतील पक्ष एकत्र लढणार की स्वतंत्र लढत देणार याकडे सर्वाचे लक्ष लागले आहे. युती की स्वतंत्र लढत या मुद्द्यावर भाजपचे मंत्री जयकुमार गोरे यांनी भाष्य केले आहे.

आगामी स्थानिक स्वराज्य संस्थांच्या निवडणुकीत आम्ही युती करूनच काढणार आहोत. पण जर युती झालीच नाही तर मग स्वबळावर निवडणुका लढवण्यासाठी आम्ही तयार आहोत अशी घोषणा ग्रामविकास मंत्री जयकुमार गोरे यांनी केली आहे. भाजप स्वबळावर निवडणुका लढण्यास तयार असल्याचे त्यांनी सांगितले.