विधान परिषदेच्या रिक्त ९ जागांपैकी एक जागा महाविकास आघाडीच्या वाट्याला आली आहे. या एका जागेसाठी ठाकरे शिवसेनेकडून माजी विरोधी पक्षनेते अंबादास दानवे आणि पक्षाच्या उपनेत्या सुषमा अंधारे यांची चर्चा आहे. दरम्यान उद्धव ठाकरे सुद्धा विधान परिषदेतून निवृत्त झाले आहेत.

उद्धव ठाकरे पुन्हा विधान परिषदेवर जाणार की नाही याबाबत अद्याप कोणताही निर्णय झाला नाहीये. परंतु उद्धव ठाकरे पुन्हा विधान परिषदेवर जाण्यास इच्छुक असतील तर आघाडीकडून कोणीही उमेदवार देणार नाहीत. असं कॉग्रेसनं म्हटलंय. तरीही या एका जागेसाठी ठाकरे गटातून चार ते पाच नेते इच्छुक आहेत. यात माजी खासदार राजन विचारे, विनायक राऊत, माजी आमदार वैभव नाईक, पक्षाचे सचिव सुरज चव्हाण यांच्यासह अंबादास दानवे व सुषमा अंधारे यांची नावे चर्चेत आहेत.

अंबादास दानवे हे काही महिन्यांपूर्वी विधान परिषदेतून निवृत्त झाले आहेत. विरोधी पक्षनेते असताना दानवेंनी सरकारविरोधात आक्रमक भूमिका घेतली होती. त्यांनी अनेक भ्रष्टाचाराची प्रकरणे उघडकीस आणत सरकारवर हल्लाबोल केला होता. आक्रमक चेहरा म्हणून त्यांचेकडे पाहिले जाते. सुषमा अंधारे यांचेही नाव विधान परिषदेच्या शर्यतीत आहे. पुणे, सातारा येथील ड्रग्ज प्रकरण, महिला अत्याचार, खरात प्रकरणांसह अनेक प्रकरणांत अंधारे यांनी सरकारला जेरीस आणलं होतं.

दरम्यान उद्धव ठाकरे विधान परिषदेचे उमेदवार असतील तर काँग्रेस त्यांना पाठिंबा देईल असं सांगितलं जात आहे. पण दुसरीकडे, उद्धव ठाकरे यांनी निवडणूक न लढवण्याची आपली भूमिका स्पष्ट केली होती. त्यामुळे विधान परिषदेची निवडणूकची रंगत वाढली आहे. दुसरीकडे ठाकरे गटातून इतर नेत्यांची नावे चर्चेत आहेत. दुसरीकडे ठाकरे स्वत: उमेदवार असतील तरच पाठिंबा देणार असल्याची भूमिका काँग्रेसने स्पष्ट केली आहे.