विकास काटे, साम टीव्ही, प्रतिनिधी

Maharashtra : स्थानिक स्वराज्य संस्थांच्या निवडणुकीसाठी राज्यातील सर्वच पक्षांनी तयारी सुरु केली आहे. निवडणुकीबाबत लवकरच घोषणा होणार असल्याचे म्हटले जात आहे. निवडणुकीच्या पूर्वीच राष्ट्रवादी काँग्रेस शरदचंद्र पवार गटाला धक्का बसला आहे. कळवा येथील असंख्य कार्यकर्ते उपमुख्यमंत्री शिंदे यांच्या शिवसेनेत प्रवेश करणार आहेत.

शरद पवार गटाचे नेते जितेंद्र आव्हाड यांच्या कळवा मुंब्रा मतदार संघाच्या कळवा येथून अनेक कार्यकर्ते शिंदेसेनेत जाणार आहे. ज्येष्ठ नगरसेवक मिलिंद पाटील यांच्या माध्यमातून पदाधिकारी, कार्यकर्ते शिवसेनेत प्रवेश करणार आहेत. ठाण्यातील टेंभी नाका येथील आनंदआश्रम येथे भव्य पक्षप्रवेशाचा कार्यक्रम पार पडणार आहे.

पक्षप्रवेशामुळे शरद पवार गट खासकरुन जितेंद्र आव्हाड यांना धक्का बसला आहे. गेल्या काही दिवसांपूर्वी जितेंद्र आव्हाड यांच्या मतदारसंघातील नगरसेवकांनी शिवसेनेमध्ये प्रवेश केला होता. यानंतर आता स्थानिक पातळीवरील असंख्य महिला कार्यकर्त्या आणि पदाधिकारी एकनाथ शिंदे यांच्या पक्षात प्रवेश करणार आहेत.

मागील काही दिवसांपासून महाराष्ट्रात राजकीय इनकमिंग आणि आउटगोईंग सुरु असल्याचे पाहायला मिळत आहे. आज जळगावमध्ये राष्ट्रवादी काँग्रेस अजित पवार गटाचा पक्षप्रवेशाचा सोहळा पार पडला. या सोहळ्यात काँग्रेसच्या महाराष्ट्र प्रदेश उपाध्यक्षा प्रतिभा शिंदे यांनी अजित पवार गटात प्रवेश केला. यामुळे जळगावमध्ये काँग्रेसला धक्का बसल्याचे म्हटले जात आहे.