विरोधी पक्षनेताचं नसलेलं हे पहिलंच अधिवेशन. महायुती सरकार सत्तेवर येऊन एक वर्ष पूर्ण झाल्यानंतरही विधानसभा आणि विधानपरिषद विरोधी पक्षनेता पद मिळालेलं नाहीय. मात्र या अधिवेशनात विरोधी पक्षनेते पद देण्यासाठी भाजपनंच नवी खेळी रचलीय. काँग्रेसचे विजय वडेट्टीवार यांना विधानसभेचं तर ठाकरेसेनेच्या अनिल परब यांना विधान परिषदेचं विरोधी पक्षनेते पद मिळावं यासाठी सहकार्याची ऑफर भाजपनं दिल्याची माहिती सूत्रांनी दिलीय. मात्र भाजपची ही ऑफर महाविकास आघाडीत फूट पाडण्यासाठी आहे का? असाही सवाल निर्माण झालाय. कारण यावर महाविकास आघाडीनं घेतलेली भूमिका.

ठाकरेसेनेच्या भास्कर जाधव यांना विधानसभेचे तर काँग्रेसचे सतेज पाटील यांना विधान परिषदेचे विरोधी पक्षनेतेपद मिळावे अशी महाविकास आघाडीची मागणी आहे. त्यातच भास्कर जाधव यांच्यासाठी ठाकरेसेनेनं तर सतेज पाटलांसाठी काँग्रेसने विधानसभा अध्यक्ष आणि विधान परिषद सभापतींना पत्रदेखील दिलयं. जाधवांना विरोधीपक्षपद न दिल्यास जाधव ठाकरेंना सोडचिठ्ठी देतील आणि भाजपा बरोबर चुल मांडतील अशी शक्यता आहे . असं झाल्यास ठाकरेची सेना पुन्हा फुटेल. दरम्यान आदित्य ठाकरेंना विरोधी पक्षनेता करण्यासाठी उद्धव ठाकरेंनी फिल्डिंग लावायला सुरु केल्याचा दावा शिंदेसेना करते आहे.