पुण्यानजीकच्या चाकण कृषी उत्पन्न बाजार समितीच्या आवारात महात्मा ज्योतिराव फुले आणि सावित्रीबाई फुले यांच्या पूर्णाकृती पुतळ्याचे अनावरण होणार आहे. सावित्रीबाई फुले यांच्या जंयतीनिमित्त या कार्यक्रमाचे आयोजन करण्यात आले आहे. या अनावरण सोहळ्यासाठी शरद पवार आणि छगन भुजबळ उपस्थित रहाणार असून या कार्यक्रमाचे अजित पवारांनाही निमंत्रण देण्यात आले आहे. त्यामुळे शरद पवारांसोबत छगन भुजबळ, अजित पवार हे एकाच मंचावर एकत्र येणार आहेत.

मंत्रीपदावरुन छगन भुजबळांनी जाहिरपणे नाराजी व्यक्त केली होती त्यानंतर छगन भुजबळ भाजपासोबत जाणार असल्याची चर्चा रंगली होती. या नाराजीनाट्यानंतर आता छगन भुजबळ हे अजित पवार आणि शरद पवारांसोबत चाकणमध्ये एकाच व्यासपिठवर येणार आहेत. त्यामुळे शरद पवारांसमोर छगन भुजबळ नेमकं काय बोलतात, आपल्या भावना व्यक्त करणार का? तसंच, अजित पवार या कार्यक्रमाला उपस्थित रहाणार का? हे पहावे लागणार आहे.