विधानसभा निवडणुकीच्या तोंडावर सर्वच राजकीय पक्षांमध्ये मोठ्याप्रमाणात इनकमिंग सुरू झाले आहे. पक्षाकडून तिकीट न मिळाल्यामुळे नाराज झालेले नेते दुसऱ्या पक्षांमध्ये एन्ट्री करत आहेत. शिंदे गट आणि भाजपकडून नाराज झालेले नेते आणि पदाधिकारी महाविकास आघाडीतील पक्षांमध्ये प्रवेश करत आहेत. अशामध्ये कोकणात भाजपला मोठा धक्का मिळाला आहे. माजी आमदार बाळ माने हे भाजपची साथ सोडणार असून ते मशाल हाती घेणार आहेत.

मिळालेल्या माहितीनुसार, रत्नागिरीमधील भाजपचे माजी आमदार बाळ माने उद्धव ठाकरे गटामध्ये प्रवेश करणार आहेत. शिवसेना शिंदे गटाकडून रत्नागिरीतून उदय सामंत यांना उमेदवारी जाहीर करण्यात आली आहे. त्यामुळे बाळ माने हे नाराज झाले आहेत. तर दुसरीकडे ठाकरे गटाचा उमेदवार देखील जवळपास निश्चित झाला आहे. बाळ माने हे ठाकरे गटामध्ये प्रवेश करणार असल्यामुळे उदय सामंत यांच्याविरोधात महाविकास आघाडीकडून बाळ माने यांनाच उमेदवारी मिळण्याची शक्यता आहे.

रत्नागिरीतील भाजपचे माजी आमदार बाळ माने शिवसेना ठाकरे गटाच्या वाटेवर आहेत. आज सकाळी ११ वाजता मातोश्रीवर शिवसेना पक्षप्रमुखे उद्धव ठाकरे यांच्या उपस्थितीमध्ये बाळ माने यांचा पक्षप्रवेश होणार आहे. त्यांच्या या निर्णयामुळे रत्नागिरीत महायुतीला खिंडार पडणार आहे. भाजपचे बाळ माने कमळ सोडून आज मशाल हाती घेणार आहेत.