काही दिवसांपासून राष्ट्रवादी काँग्रेसमध्ये अंतर्गत वाद सुरू असल्याची चर्चा सुरू आहे. या नाराजीनाट्याच्या पार्श्वभूमीवर शनिवारी रात्री एक नवीन घडामोड घडली. ते म्हणजे राष्ट्रवादी काँग्रेसचे खासदार आणि सुनेत्रा पवार यांचे पुत्र पार्थ पवार यांनी शनिवारी अचानक मुख्यमंत्री देवेंद्र फडणवीस यांची भेट घेतली.

पार्थ पवार भेटीची कोणालाच माहिती नव्हती. हे शनिवारी रात्री 10 वाजण्याच्या सुमारास दोन्ही नेत्यांची भेट झाली. या भेटीत त्यांच्यात कोणत्या विषयावर चर्चा झाली याबाबत तर्क-वितर्कांचे पेव फुटले. आता खुद्द मुख्यमंत्र्यांनी पार्थ पवार भेटीची आतली गोष्ट सांगितली आहे. पुण्यातील कृषी महाविद्यालयात सिंचन नगर मैदानात पुणे ॲग्री हॅकॅथॉन 2026 पारितोषिक वितरण व समारोप समारंभानंतर पत्रकारांशी बोलताना देवेंद्र फडणवीस यांनी शेतकरी कर्जमाफीची माहिती दिली. यासह त्यांनी पार्थ पवार भेटीवर भाष्य केलं.

मुख्यमंत्र्यांनी काय सांगितलं?

राष्ट्रवादी काँग्रेसचे ज्येष्ठ नेते प्रफुल पटेल आणि सुनील तटकरे यांना पक्षाच्या राष्ट्रीय कार्यकारिणीतून वगळल्याची बाब समोर आल्यानंतर नाराजीनाट्याला सुरुवात झाली होती. एकीकडे प्रफुल पटेल आणि सुनील तटकरे यांना पक्षात साईडलाईन केल्याची चर्चा सुरू आहे. पण सुनेत्रा पवार आणि पार्थ पवार यांनी या सगळ्याबाबत काही प्रतिक्रिया दिली नाही.

तर दुसरीकडे आमदार रोहित पवार हे जवळपास दररोज प्रफुल पटेल आणि सुनील तटकरे यांच्यावर शा‍ब्दिक हल्ले चढवत आहेत. त्याच दमरम्यान पार्थ पवार यांनी मुख्यमंत्र्यांची भेट घेतली. या भेटीत पार्थ पवार यांनी राष्ट्रवादीतील वादाची चर्चा मुख्यमंत्र्यांशी केल्याची चर्चा आहे. त्यामुळे वेगवेगळे तर्क लढवले जात आहेत.

आज मुख्यमंत्र्यांनी पार्थ पवार यांची भेटीचं कारण सांगितलं. काल मला पार्थ पवार मला भेटले. काही प्रशासनिक विषय होते, काही राजकीय विषय होते. त्याच्यावर त्यांनी माझ्याशी चर्चा केली, असं फडणवीस यांनी भेटीबाबत सांगितलं. आम्ही मित्रपक्ष आहोत, त्यामुळे ते मला येऊन भेटणे ही काही मोठी बातमी आहे, असं वाटत नाही,असेही फडणवीस म्हणाले. राज्यात कुठलंही ऊर्जा संकट नाही, आपल्याला आवश्यक त्यापेक्षा जास्त ऊर्जा आहे. एखाद्या ठिकाणी कधीतरी ग्रीड फेल्युअर होतं,त्यामुळं काही काळाकरता, काही तासांकरता ऊर्जा संकट तयार होतं. राज्यात भरपूर वीज आहे, असंही फडणवीस यांनी स्पष्ट केलं.