Summary -

• यवतमाळमध्ये भाजपला मोठा धक्का

• विजय चोरडिया यांनी भाजपची साथ सोडली

• चोरडिया यांनी आपल्या समर्थकांसह शिवसेना शिंदे गटात केला प्रवेश

• पक्षांतर्गत गटबाजी आणि अपमानामुळे त्यांनी भाजपला ठोकला रामराम

आगामी स्थानिक स्वराज्य संस्थांच्या निवडणुकीपूर्वी यवतमाळमध्ये भाजपला मोठा धक्का बसला आहे. यवतमाळमधील भाजपच्या बड्या नेत्यासह अनेक पदाधिकारी आणि कार्यकर्त्यांनी पक्षाची साथ सोडत शिवसेना शिंदे गटामध्ये प्रवेश केला. भाजपाचे नेते विजय चोरडिया यांनी आपल्या कार्यकर्त्यांसह धनुष्यबाण हाती घेतलं. त्यामुळे यवतमाळमध्ये शिंदे गटाची ताकद चांगलीच वाढली आहे.

यवतमाळच्या वणी येथील भाजपाचे नेते विजय चोरडिया यांना यवतमाळचे पालकमंत्री संजय राठोड यांनी गळाला लावले आहे. विजय चोरडिया हे मोठे व्यावसायिक आणि भाजप संघटनेत सक्रिय होते. मात्र पक्षांतर्गत गटबाजीमुळे भाजप कमकुवत होत आहे आणि पक्षात मानसन्मान शिल्लक नाही, असे सांगत विजय चोरडिया यांनी मुंबईत उपमुख्यमंत्री एकनाथ शिंदे यांच्या उपस्थितीत शिवसेनेचा झेंडा हाती घेतला.

विजय चोरडिया यांच्या या पक्षप्रवेशामुळे केंद्रीय मागासवर्गीय आयोगाचे अध्यक्ष हंसराज अहीर यांना मोठा धक्का मानला जात आहे. भाजपने वणी विधानसभा आणि लोकसभा मतदारसंघ गटबाजीने गमाविल्या नंतर चोरडिया यांनी पक्ष सोडणे हे आगामी स्थानिक स्वराज्य संस्थेच्या निवडणुकीत भाजपसाठी धोक्याची घंटा मानली जात आहे. तर विजय चोरडिया यांच्या पक्ष प्रवेशामुळे शिवसेना आणखी मजबूत झाली आहे.