आगामी स्थानिक स्वराज्य संस्थांच्या निवडणुकीपूर्वी राज्यात राजकीय घडामोडींना वेग आला आहे. निवडणुकीपूर्वीच अनेक पक्षांमध्ये इनकमिंक तर काही पक्षांमध्ये आऊटगोईंग सुरू आहे. अशातच रायगडमध्ये उपमुख्यमंत्री अजित पवार यांच्या राष्ट्रवादीला मोठा धक्का बसला आहे. राष्ट्रवादी काँग्रेस अजित पवार गटाच्या अनेक बड्या नेत्यांनी पक्षाची साथ सोडत शिवसेना शिंदे गटात पक्षप्रवेश केला आहे.

मिळालेल्या माहितीनुसार, अजित पवार गटाचे खोपोलीमधील माजी उपनगराध्यक्ष कुलदीपक शेंडे यांच्यासह अनेक माजी नगरसेवक आणि पदाधिकाऱ्यांनी पक्षाची साथ सोडली. या सर्वांनी शिवसेना शिंदे गटामध्ये प्रवेश केला. खोपोलीमध्ये राज्याचे रोजगार हमी मंत्री भरत गोगावले यांच्या उपस्थितीमध्ये हा पक्षप्रवेशाचा कार्यक्रम पार पडला. यावेळी कुलदीपक शेंडे यांच्या अनेक पदाधिकारी आणि कार्यकर्त्यांनी देखील धनुष्यबाण हाती घेतलं.

खोपोली नगरपरिषद निवडणुकीच्या दृष्टीने शिंदेंच्या शिवसेनेने जोरदार मोर्चे बांधणी करायला सुरुवात केली आहे. अशातच आता राष्ट्रवादी काँग्रेसच्या माजी उपनगराध्यक्षांसह अनेक बड्या नेत्यांनी शिंदे गटामध्ये प्रवेश केला. त्यामुळे स्थानिक स्वराज्य संस्थांच्या निवडणुकीपूर्वी रायगडमध्ये शिंदे गटाची ताकद आणखी वाढली आहे. हा अजित पवारांच्या पक्षासाठी मोठा धक्का मानला जात आहे.