विधानसभा निवडणुकीमध्ये महायुतीने विजय मिळवला. निकाल लागून ११ दिवस झाले तरी देखील राज्यात अद्याप सरकार स्थापन झाले नाही. राज्यात सराकर स्थापनेवरून सध्या गोंधळ सुरू आहे. महायुतीमध्ये भाजप आणि शिवसेना दोन्ही पक्ष गृहमंत्रीपदासाठी आग्रही आहे.

मंत्रिपदाच्या वाटापावरून महायुतीमध्ये सुरू असलेल्या गोंधळामुळे शपथविधीला उशिर होत आहे. या सर्व गोंधळादरम्यान आता राष्ट्रवादी काँग्रेस अजित पवार गटाचे नेते छगन भुजबळ यांनी मोठं विधान केले आहे. 'महायुतीत शिवसेनेपेक्षा राष्ट्रवादीचा स्ट्राइक रेट जास्त आहे.', असे विधान छगन भुजबळ यांनी केले आहे.

नाशिकमध्ये माध्यमांशी संवाद साधताना छगन भुजबळ यांनी मंत्रिपदाच्या वाटपाबाबत मोठं विधान केले आहे. 'शिंदेंच्या शिवसेनेपेक्षा अजित पवार गटाचा स्ट्राइक रेट जास्त आहे. स्ट्राइकरेटनुसार आम्ही २ नंबरवर आहोत. महायुतीमध्ये भाजप एक नंबरवर आणि आम्ही दोन नंबरवर आहोत.', छगन भुजबळ यांच्या या वक्तव्यामुळे राजकीय वर्तुळात चर्चांना उधाण आले आहे.

छगन भुजबळांनी सांगितले की, 'अजित दादासोबत आमची बैठक झाली तेव्हा स्ट्राइक रेटबाबत विषय झाला. राज्यात एक नंबर भाजप आहे तर दोन नंबरला आम्ही आहे.' मंत्रिमंडळामध्ये नवीन चेहऱ्यांना संधी मिळेल का? यावर उत्तर देताना भुजबळांनी सांगितले की, 'नवीन चेहऱ्यांना संधी नेहमी देण्यात येते. यावेळी जरा अडचण जास्त आहेत. दरवेळी १६० असतात. यावेळी जास्त आमदार आहेत. सर्व पक्षांमध्ये नवीन जुने चेहरे येतील.'

शिवसेनेचे नेते गुलाबराव पाटील यांनी मंत्रिपद वाटप आणि स्ट्राईक रेटवरून राष्ट्रवादीला टोला लगावला आहे. त्यांनी सांगितले की, 'राष्ट्रवादी काँग्रेसने त्यांच्या मंत्रिपदाची मागणी केली आहे. आमची मागणी शिंदेसाहेब करत आहेत. आम्ही प्रमोद महाजन साहेबांच्या वेळीची युती टिकवून ठेवण्यासाठी लढलो. आम्ही ६ महिने फोन बंद केले. आम्ही त्यामुळे १०० जागा लढलो असतो आणि जास्त जागा जिंकलो असतो.'