Maharashtra : एकनाथ शिंदे यांच्या शिवसेनेतील नेते रामदास कदम यांच्या आरोपांमुळे मुंबईतील राजकीय वातावरण तापले आहे. बाळासाहेब ठाकरे यांच्याबाबत केलेल्या वक्तव्यामुळे महाराष्ट्रातील राजकारण पेटले आहे. या प्रकरणामुळे शिवसेनेत आरोप-प्रत्यारोप सुरु आहेत. अशातच राज्यमंत्री योगेश कदम यांनी उद्धव ठाकरेंच्या शिवसेनेला धक्का दिला आहे.

दापोलीसह रत्नागिरी जिल्ह्यात आगामी स्थानिक स्वराज्य संस्थांच्या निवडणुकीसाठी तयारी सुरु आहे. निवडणूकीच्या पार्श्वभूमीवर ठाकरेंची शिवसेना आणि शरद पवारांची राष्ट्रवादी काँग्रेस यांना गळती सुरु असल्याचे म्हटले जात आहे. राजन तेली यांनी ठाकरे गटातून शिंदेसेनेत प्रवेश केला. हा ठाकरे गटासाठी धक्का होता. यानंतर आता योगेश कदम यांनीही ठाकरेसेनेला धक्का दिला आहे.

ठाकरे गटाचे नेते सदानंद कदम हे रामदास कदम यांचे बंधी आहेत. पण दोन्ही कदम बंधू हे एकमेकांचे कट्टर विरोधी आहेत. दोघांमधील वैमनस्य सर्वश्रुत आहे. दोन वेळा पंचायत समिती सदस्य असलेल्या योगिता बांद्रे आणि प्रकाश सकपाळ हे सदानंद कदम यांचे कट्टर समर्थक आहेत. या दोघांना शिंदेसेनेमध्ये आणून योगेश कदम यांनी मोठी खेळी कली आहे.

याआधी अमरीश हेदुकर हे शिवसेनेमध्ये सामील झाले होते. आता सदानंद कदम यांचे दुसरे सहकारी प्रकाश सकपाळ देखील शिवसेनेमध्ये दाखल झाले आहेत. सलग धक्क्यांवर धक्के बसत असल्याने आगामी स्थानिक संस्थांच्या निवडणूकींपूर्वी शिवसेना ठाकरे गटाला गळती सुरु असल्याची मोठी चर्चा कोकणात सुरु आहे.