Maharashtra : स्थानिक स्वराज्य संस्थांच्या निवडणुकीच्या पार्श्वभूमीवर राज्यातील सर्व पक्षांनी मोर्चेबांधणीला सुरुवात केली आहे. या पार्श्वभूमीवर पक्षांमध्ये इनकमिंग आणि आउटगोईंग होत असल्याचे पाहायला मिळत आहेत. आगामी निवडणुकीच्या आधी शिवसेना शिंदे गटाला मोठा धक्का बसल्याची माहिती समोर आली आहे.

मिळालेल्या माहितीनुसार, एकनाथ शिंदे गटाचे नंदुरबारमधील नेते संतोष पाटील यांनी भाजपमध्ये प्रवेश केला. ते शिंदे गटाचे आमदार चंद्रकांत रघुवंशी यांचे निकटवर्तीय होते. भाजपचे आमदार विजयकुमार गावित आणि माजी खासदार हिना गावित यांच्या उपस्थितीत संतोष पाटील यांचा भाजपमध्ये प्रवेश झाला. या पक्षप्रवेशामुळे नंदुरबारमध्ये आमदार चंद्रकांत रघुवंशी यांना आणि शिवसेना शिंदे गटाला मोठा झटका बसला असल्याचे म्हटले जात आहे.

मागील ६० वर्षांपासून संतोष पाटील हे रघुवंशी कुटुंबाशी जोडलेले होते. संतोष पाटील हे धुळे-नंदुरबार जिल्हा मध्यवर्ती बँकेचे संचालक आहेत. याशिवाय ते तिलाली गावचे सरपंच आणि विकास सोसायटीचे अध्यक्ष देखील आहेत. नंदुरबार तालुक्याच्या पूर्व भागामध्ये संतोष पाटील यांचा मोठा प्रभाव असल्याचे मानले जाते.

'रघुवंशी त्यांच्या निकटवर्तीयांना डावलत आहेत, त्यांचे खच्चीकरण करत आहेत. निकटवर्तीयांना ते कोणत्याही कार्यक्रमांमध्ये बोलावत नाही, विश्वासात घेत नाही' असे म्हणत संतोष पाटील यांनी नाराजी व्यक्त केली. या नाराजीमुळेच पाटील यांनी शिंदे गटातून बाहेर पडून भाजपमध्ये जाण्याचा निर्णय घेतला असे म्हटले जात आहे.