केंद्रीय गृहमंत्री अमित शहा यांनी राज्यसभेमध्ये डॉ. बाबासाहेब आंबेडकर यांच्याबाबत केलेल्या वक्तव्यावरून राजकारण चांगलेच तापले आहे. यावरून काँग्रेससोबत विरोधक आक्रमक झाले आहेत. आजही विधानसभेमध्ये विरोधक आक्रमक झाल्याचे चित्र पाहायला मिळाले. विरोधक आज डॉ. बाबासाहेब आंबेडकर यांचा फोटो घेऊन सभागृहात आले आणि त्यांनी आंबेडकरांचा फोटो आसनावर ठेवला.

विरोधकांच्या या कृतीमुळे सभागृहामध्ये गोंधळाचे वातावरण होते. या कृतीमुळे सत्ताधारी आणि विरोधकांमध्ये जोरदार खडाजंगी झाली. गुरूवारी मुंबईमध्ये काँग्रेस कार्यालयावर हल्ला झाला. काँग्रेस नेत्यांच्या फोटोंवर शाईफेक झाली. हा मुद्दा विधानसभेमध्ये उपस्थित करण्यात आला. यावर काँग्रेस नेते विजय वडेट्टीवार यांनी प्रश्न उपस्थित केले. यावेळी विरोधकांच्या आसनावर डॉ. बाबासाहेब आंबेडकरांचा फोटो होता. हा मुद्दा सत्ताधाऱ्यांनी उचलून धरला.

यावेळी उपमुख्यमंत्री अजित पवार यांनी विरोधकांना आवाहन केले की, डॉ. बाबासाहेब आंबेडकर यांच्यावर आमचा देखील हक्क आहे. बाबासाहेब आंबेडकर फक्त तुमचेच आहेत का? तुम्ही बाबासाहेब आंबेडकर यांचे फोटो लावत आहात. तर आमच्याही बाकावर फोटो लावा.' डॉ. बाबासाहेब आंबेडकर यांचे फोटो आसनावर लावण्याची परवानगी द्यावी असे आवाहन भाजप आमदाराने केले. त्यानंतर सत्ताधारी आणि विरोधक यांनी गोंधळ घातला. या गोंधळानंतर विधानसभा अध्यक्षांनी सभागृहाचे कामकाज १० मिनिटांसाठी तहकूब करण्यात आले.