अक्षय बडवे| पुणे, ता. ४ जुलै २०२४

लोकसभेनंतर राज्यात विधानसभा निवडणुकांचे वारे वाहू लागले आहेत. विधानसभेसाठी राजकीय पक्षांनी मोर्चेबांधणी सुरू केली आहे. अशातच लोकसभेआधी मनसेला रामराम ठोकून वंचित बहुजन आघाडीमध्ये गेलेले वसंत तात्या मोरे मोठा निर्णय घेण्याच्या तयारीत असल्याची माहिती समोर आली आहे.

समोर आलेल्या माहितीनुसार, पुण्याचे माजी नगरसेवक वसंत मोरे ठाकरे गटाच्या वाटेवर असल्याची मोठी माहिती समोर आली आहे. लोकसभेच्या तोंडावर वसंत मोरे यांनी प्रकाश आंबेडकर यांच्या वंचित बहुजन आघाडीमध्ये प्रवेश केला होता. वंचितकडून ते निवडणूकही लढले होते.

आता विधानसभेआधी ते शिवसेना ठाकरे गटात प्रवेश करणार असल्याचे सांगण्यात येत आहे. आज वसंत मोरे हे मातोश्रीवर जाऊन उद्धव ठाकरे यांची भेट घेणार आहेत. वसंत मोरे हे खडकवासला किंवा हडपसर विधानसभा मतदारसंघातून निवडणूक लढवण्यासाठी इच्छुक आहेत. त्यामुळेच ते ठाकरे गटाच्या वाटेवर असल्याची चर्चा आहे.

संजय राऊतांचे सूचक वक्तव्य..

दरम्यान, वसंत मोरे यांच्या पक्षप्रवेशावर शिवसेना ठाकरे गटाचे नेते, खासदार संजय राऊत यांनीही महत्वाचे विधान केले आहे. लवकरच वसंत मोरे हे ठाकरे गटात प्रवेश करतील असे सूचक विधान राऊतांनी केल्याने राजकीय वर्तुळात चर्चा रंगल्या आहेत.