महाराष्ट्राच्या राजकारणातून मोठी बातमी समोर आली आहे. राष्ट्रवादी काँग्रेस पक्षाचे माजी प्रदेशाध्यक्ष मधुकर पिचड आणि त्यांचे चिरंजीव वैभव पिचड यांनी आज शरद पवार यांची भेट घेतली. सिल्वर ओक या शरद पवारांच्या निवासस्थानी ही भेट झाली. शरद पवार यांच्यासोबत पिचड कुटुंबाची अर्धा तास चर्चा झाली. त्यामुळे मधुकर पिचड राष्ट्रवादी काँग्रेस पक्षामध्ये प्रवेश करणार असल्याच्या चर्चांना उधाण आले आहे.

मधुकर पिचड यांनी काही वर्षांपूर्वी राष्ट्रवादीची साथ सोडत भाजपचे कमळ हाती घेतले होते. आता पिचड कुटुंबीय भाजपमध्ये आहेत. पण महायुतीत अकोले विधानसभेची जागा अजित पवार यांच्या राष्ट्रवादीला सुटत असल्यामुळे पिचड कुटुंबीय राष्ट्रवादी काँग्रेस शरद पवारांच्या पक्षाचे चिन्ही तुतारी हातात घेण्याच्या तयारीत असल्याचे बोलले जात आहे.

कोण आहेत मधुकर पिचड आणि वैभव पिचड? -

जेष्ठ नेते मधुकरराव पिचड शरद पवारांचे जुने सहकारी आणि खंदे समर्थक आहेत. राष्ट्रवादीच्या स्थापनेपासून शरद पवारांसोब ते मधुकर पिचड राष्ट्रवादी काँग्रेसचे प्रदेशाध्यक्ष राहिलेले आहेत. २०२४ पर्यंत ते अहमदनगर जिल्ह्यातील अकोले विधानसभेचे आमदार होते. २०१४ साली राष्ट्रवादीच्या तिकीटावर त्यांचा मुलगा वैभव पिचड आमदार झाले. २०१९ साली पिचड पिता - पुत्रांनी भाजपमध्ये प्रवेश केला. ऐनवेळी शरद पवारांनी किरण लहामटे यांना उमेदवारी दिली. २०१९ मध्ये वैभव पिचड यांचा पराभव झाला.

राष्ट्रवादीच्या फुटीनंतर आमदार किरण लहामटे अजित पवारांसोबत गेले. त्यामुळे महायुतीत मधुकर पिचड आणि वैभव पिचड यांची राजकीय अडचण झाली. उमेदवारी करण्यासाठी पर्यायाची गरज आहे. अशातच मधुकर पिचड आणि वैभव पिचड यांनी शरद पवारांची भेट घेतली. या भेटीमुळे आता राजकीय वर्तुळात चर्चांना उधाण आले आहे. पिचड पुन्हा शरद पवारांसोबत जाणार असल्याच्या चर्चा होत आहेत. पण ही भेट पेसा कायद्यासंदर्भात घेतल्याची माहिती समोर आली आहे. पिचड यांनी शरद पवार गटामध्ये प्रवेश केला तर अजित पवार गटाचे टेन्शन वाढण्याची शक्यता आहे.