Sanjay Raut: मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी रविवारी रात्री केंद्रीय गृहमंत्री अमित शहा यांची भेट घेतली. यावेळी झालेल्या बैठकीत रखडलेल्या मंत्रिमंडळाच्या विस्तारावरून चर्चा झाली. यावरून शिवसेना ठाकरे गटाचे खासदार संजय राऊत यांनी एकनाथ शिंदे यांच्यावर हल्लाबोल केला आहे. (Latest Marathi News)

मंत्रीमंडळाचा विस्तार करण्यासाठी आम्हला कधीही दिल्लीला जावं लागलं नाही. पूर्वी आमचं कंट्रोलरूम इथेच होतं. आता इथेल निर्णय घ्यायला लोकांना दिल्लीला जावं लागत आहे. तुमच्याकडे खरी शिवसेना आहे असं बोलता ना?, मग दाखवा की हिंमत. ही नकली शिवसेना असून यांना प्रत्येक गोष्टीला परवानगी लागते, अशी टीका राऊतांनी शिंदे गटावर केली आहे.

पुढे त्यांनी संताप व्यक्त करत म्हटलं की, बाळासाहेबांचं नाव घेता आणि मोदी-शाहांकडे का जाता? फडणवीसांचं मी समजू शकतो, त्याचं मक्का मदिना दिल्लीतच आहे. पण तुमचं काय?, असा प्रश्न राऊतांनी शिंदेंना विचारला आहे.

ओडिशातील बालासोर येथे झालेल्या दुर्घटनेची सीबीआय चौकशी करण्याचे आदेश देण्यात आले आहेत. यावरून बोलताना राऊतांनी म्हटलं आहे की, "ट्रेन दुर्घटनेची सीबीआय चौकशी करून काय साध्य होणार? खोटं आश्वासन आणि मोठ्या बाता बंद करा. बुलेट ट्रेनची स्वप्न पूर्ण करण्याआधी आहेत त्या ट्रेन व्यवस्थित चालवा. आता म्हणत आहेत की हा घातपात होता, मग तुमची यंत्रणा काय करत होती? यामध्ये रेल्वे मंत्र्यांची जबाबदारी नाही का?, असा सवालही राऊतांनी केंद्र सरकारला विचारला आहे.