मराठा आरक्षणाच्या लढ्यासाठी पुढील निर्णायक टप्पा म्हणून घोषित करण्यात आलेल्या २९ ऑगस्टच्या मुंबई आंदोलनाला मराठा क्रांती मोर्चाचे नेते मनोज जरांगे पाटील यांनी अधिक धारदार रूप दिले आहे. धाराशिवमध्ये पार पडलेल्या बैठकीत बोलताना त्यांनी थेट इशारा दिला की, "जो नेता २९ ऑगस्टच्या आंदोलनात सहभागी होणार नाही, त्याला आगामी सर्व निवडणुकांमध्ये पाडा", असे आवाहन मराठा समाजाला त्यांनी केलं आहे.

दरम्यान, राजकीय पक्षांच्या भूमिका, सत्ताधाऱ्यांची उदासीनता, आणि आरक्षणप्रश्नी सुरू असलेली वेळकाढूपणा यामुळे संतप्त झालेल्या मराठा समाजात पुन्हा एकदा आंदोलनाची लाट उसळू लागली आहे. मनोज जरांगे सध्या राज्यभर चावडी बैठकींच्या माध्यमातून जनजागृती करत असून, मराठा आरक्षणाचा निर्णय लवकरात लवकर झाला पाहिजे, अन्यथा व्यापक आंदोलनाच्या तयारीत राहा, असा संदेश ते गावागावांत पोहोचवत आहेत.

धाराशिव येथील बैठकीत त्यांनी स्पष्टपणे म्हटले की, “आता वेळ आली आहे, केवळ घोषणा पुरेशा नाहीत. जे खऱ्या अर्थाने मराठा समाजाच्या मागे आहेत, त्यांनी २९ ऑगस्टला मुंबईला यावं. जो येणार नाही, त्याचा राजकीय निकाल पुढच्या निवडणुकीत समाजाने लावावा.” मराठा आरक्षणाच्या मुद्द्यावर सरकार वेळ मारून नेत असल्याचा आरोप करत त्यांनी सांगितले की, आता फक्त आश्वासनं चालणार नाहीत, निर्णय हवा आहे. आंदोलनाच्या दिवशी राज्यभरातील लाखो मराठा बांधव मुंबईत जमणार असून, हे ऐतिहासिक आंदोलन ठरणार आहे.

विशेष म्हणजे, याआधी देखील मनोज जरांगे पाटील यांनी जलसमाधी आंदोलन करून राज्य सरकारला अडचणीत आणलं होतं. यंदाच्या आंदोलनाकडे सरकार व प्रशासन कसे पाहते, याकडे साऱ्या राज्याचे लक्ष लागून राहणार आहे. जर या आंदोलनाला नेत्यांकडून प्रतिसाद मिळाला नाही, तर हे राजकीय भूकंपाचे कारण ठरू शकते. मराठा समाजाची ताकद निवडणुकांमध्ये किती निर्णायक ठरते, हे यापूर्वी अनेकदा सिद्ध झाले आहे. त्यामुळे २९ ऑगस्टचे आंदोलन केवळ आरक्षणासाठीच नव्हे, तर राजकीय समीकरणांसाठीही टर्निंग पॉईंट ठरू शकते.