माधव सावरगावे, छत्रपती संभाजीनगर

छत्रपती संभाजीनगर जिल्हा परिषदेच्या अध्यक्षपदाचा पेच आता अधिकच गडद झाला आहे. भाजप आणि शिंदे सेनेमध्ये सत्तेसाठी रस्सीखेच सुरू असतानाच, आता शिवसेना ठाकरे गटाने या शर्यतीत उडी घेतली आहे. यामुळे महायुतीच्या गोटात खळबळ उडाली आहे. अंबादास दानवे यांनी मुंगीरीलालचे हसीन सपने पाहू नयेत, असा टोला भाजपने लगावला. मात्र जिल्हा परिषदेवर भगवा कोणाचा फडकणार? याकडे सर्वांचे लक्ष लागले आहे.

जिल्हा परिषद निकालात भाजप २३ जागांसह सर्वात मोठा पक्ष ठरला असला तरी, बहुमताचा आकडा गाठण्यासाठी त्यांना कसरत करावी लागत आहे. याच संधीचा फायदा घेत ठाकरे गटाचे नेते अंबादास दानवे यांनी खळबळजनक विधान केले आहे. दानवे म्हणाले, काही लोक आमच्या संपर्कात आहेत. जर कुणी पाठिंबा दिला तर आम्ही नक्कीच सत्ता स्थापनेचा विचार करू. दानवे यांच्या या विधानामुळे महायुतीमधील फोडाफोडीच्या राजकारणाची चर्चा रंगली आहे.

​मात्र, दानवेंच्या या विधानाला भाजपचे आमदार संजय केणेकर यांनी जोरदार प्रत्युत्तर दिले आहे. केणेकर यांनी टोला लगावत म्हटले की, अंबादास दानवे यांनी मुंगीरीलालचे हसीन सपने पाहू नयेत. सत्ता आमचीच येणार आहे. महायुतीकडे कागदावर स्पष्ट बहुमत दिसत असले तरी, ठाकरे गटाची वेट अँड वॉच ची भूमिका आणि अंतर्गत नाराजीचा फायदा घेण्याचे प्रयत्न यामुळे ही निवडणूक चुरशीची ठरणार आहे.