अर्थसंकल्पीय अधिवेशनाचा शेवटचा दिवस विरोधी पक्षनेतेपदाच्या निवडीवरुन गाजलाय. महाविकास आघाडीने भास्कर जाधवांच्या नावाचा प्रस्ताव दिल्यानंतरही विधानसभा अध्यक्षांनी विरोधी पक्षनेत्याची निवड केली नाही.. तोच धागा पकडून भास्कर जाधवांनी विरोधी पक्षनेत्याच्या निवडीचा विषय छेडला.. तर उपाध्यक्षांच्या निवडीनंतर शेजारची खुर्ची रिक्त ठेऊ नका, असं वक्तव्य जयंत पाटलांनी केलंय...

तर विधानसभा उपाध्यक्षांच्या शेजारच्या खुर्चीचा विषय छेडताच विरोधी पक्षनेत्याची निवड लांबणीवर टाकल्याचे संकेत मुख्यमंत्री देवेंद्र फडणवीसांनी दिलेत...एवढंच नाही तर विरोधी पक्षनेत्याच्या निवडीचा चेंडू अध्यक्षांच्या कोर्टात ढकललाय...तर विधानसभा अध्यक्ष राहुल नार्वेकरांनीही हा निर्णय घाईने घेऊ का? असं म्हणत विरोधी पक्षनेत्याची निवड करण्यासाठी वेळ लागणार हे स्पष्ट केलंय...

सत्ता स्थापनेला साडेतीन महिने पूर्ण झालेत.. दरम्यान हिवाळी आणि अर्थसंकल्पीय अधिवेशन पार पडलंय.. मात्र 2 अधिवेशनानंतरही विधानसभेला विरोधी पक्षनेता मिळाला नाही... सध्या महाविकास आघाडीला विरोधी पक्षनेतेपदाची खुर्ची नाही तर सत्ताधाऱ्यांनी मिर्चीच दिल्याची चर्चा आहे... त्यामुळे आता पावसाळी अधिवेशनात तरी राज्याला विरोधी पक्षनेता मिळणार की 2014 आणि 2019 मधील लोकसभेप्रमाणे भाजप विरोधकांना विरोधी पक्षनेतेपदापासून दूर ठेवणार? याकडे लक्ष लागलंय...