अजय सोनावणे - नाशिक

नाशिक जिल्ह्यातील मालेगाव शहरात एक हृदयाला भिडणारी घटना घडली आहे. मालेगाव नामपूर रस्त्यावरील एका १०० फूट खोल विहिरीवर पाणी भरत असताना २५ वर्षीय पूजा कैलास वाघ ही महिला अचानक तोल जाऊन थेट विहिरीत कोसळली. घटना घडताच आजूबाजूला उपस्थित लोकांमध्ये खळबळ उडाली. विहिरीत पडलेल्या महिलेला वाचवण्यासाठी तिच्या पतीने उडी मारली. सुदैवाने गावकऱ्यांच्या मदतीने दोघांनाही सुखरूप बाहेर काढण्यात आले.

मिळालेल्या माहितीनुसार, पूजा कैलास वाघ या मालेगावातील रहिवाशी आहेत. नामपूर रस्त्यावरील यश गार्डनच्या पाठीमागे असलेल्या सुमारे १०० फूट खोल विहिरीवर त्या पाणी भरण्यासाठी गेल्या असता अचानक तोल जाऊन थेट विहिरीत कोसळल्या. घटना घडताच रहिवाशांनी घटनास्थळी गर्दी केली. त्या क्षणीच पती कैलास वाघ यांनी क्षणाचाही विलंब न करता पत्नीला वाचवण्यासाठी धाडसी निर्णय घेत थेट विहिरीत उडी मारली.

दोघेही पाण्यात तडफडत असल्याचे पाहून गावकऱ्यांनी तातडीने बचावकार्य सुरू केले. खाट टाकून आणि दोरीच्या साहाय्याने ग्रामस्थांनी आटोकाट प्रयत्न करत अखेर पती-पत्नी दोघांनाही सुरक्षित वर काढले. तात्काळ त्यांना मालेगावच्या सामान्य रुग्णालयात दाखल करण्यात आले, जिथे डॉक्टरांनी त्यांच्यावर त्वरित उपचार केले.

सुदैवाने या घटनेत मोठा अनर्थ टळला असून दोघांचे जीव वाचले आहेत. सध्या त्यांची प्रकृती स्थिर आहे. या घटनेमुळे स्थानिक नागरिकांनी पतीच्या धाडसाचे आणि ग्रामस्थांच्या तात्काळ प्रतिसादाचे कौतुक केले आहे. ग्रामीण भागात अशा प्रसंगी दाखवलेली सामूहिक तत्परता आणि परस्पर मदतीची भावना हीच दोघांच्या जीव वाचविण्यास कारणीभूत ठरल्याचे सर्वत्र सांगितले जात आहे.