स्थानिक स्वराज्य संस्थांच्या निवडणुका जाहीर होताच नेते मंडळींना पक्ष बदलाचे वारे लागले. आगामी काळातील संधी लक्षात घेता अनेक नेते मंडळी एका पक्षातून दुसऱ्या पक्षात प्रवेश करीत आहेत. लातूरच्या उदगीरचे माजी आमदार सुधाकर भालेराव यांनीही भावी संधी आपल्याला मिळेल या आशेनं एकनाथ शिंदे यांच्या शिवसेना पक्षात शेकडो सहकाऱ्यांसह प्रवेश केलाय. लातूर शहराचे माजी महापौर सुरेश पवार यांनीही धनुष्यबाण हाती घेतलंय. दोन्ही प्रवेशामुळे लातूर जिल्ह्यात राष्ट्रवादी काँग्रेसला मोठा धक्का बसला.

शिवसेनेचे मुख्य नेते आणि उपमुख्यमंत्री एकनाथ शिंदे यांच्या उपस्थितीत पदाधिकाऱ्यांचे पक्षप्रवेशाचा कार्यक्रम संपन्न झाला. बीड, पुणे, बारामती अशा विविध भागांतील राजकीय पक्षातील पदाधिकाऱ्यांनी शिवसेनेत पक्ष प्रवेश केला. लातूर जिल्ह्यातील उदगीर विधानसभा मतदारसंघातील माजी आमदार सुधाकर भालेराव यांचा त्यांच्या कार्यकर्त्यांसह शिवसेनेत पक्ष प्रवेश झाला. सुधाकर भालेराव २००९ आणि २०१४ साली उदगीर विधानसभा मतदारसंघातून भाजपचे आमदार होते.

राष्ट्रवादीचे नेते संजय बनसोडे यांनी २०१९ मध्ये भालेराव यांचा पराभव केला. २०२४ साली भाजपने सुधाकर भालेराव यांना तिकीट नाकारल्याने विधानसभेला त्यांनी राष्ट्रवादी काँग्रेसमध्ये पक्ष प्रवेश केला. मात्र त्या निवडणुकीतही जनतेने त्यांना नाकारले. त्यानंतर आता ते स्थानिक स्वराज्य संस्थेच्या निवडणुकीच्या तोंडावर शिवसेनेत पक्ष प्रवेश करत आहेत. तर लातूर शहराचे माजी महापौर सुरेश पवार ६ वेळा राष्ट्रवादी काँग्रेसचे नगरसेवक होते. त्यांनीही भालेराव यांच्यासोबत शिवसेना पक्षात प्रवेश केला.