29 महापालिका निवडणुकीचा निकाल अखेर लागला आहे. या निकालामध्ये पुन्हा एकदा विरोधकांचा धुव्वा उडवत भाजपने मुसंडी मारली आहे. अवघ्या देशाचे लक्ष लागून असलेल्या मुंबई महापलिकेवर देखील भाजपने झेंडा फडकवला असून ठाकरे बंधुना मोठा धक्का बसला आहे. मात्र एकनाथ शिंदे यांचा बालेकिल्ला असणाऱ्या ठाण्यात एक जगावेगळा निकाल लागला आहे.

एकाच कुटुंबातील तीन सदस्यांनी तीन वेगवेगळ्या पक्षांच्या चिन्हावर निवडणूक लढवली आणि तिघेही जिंकून आले. यामुळे अनेकांनी आश्चर्य व्यक्त केले आहे. ठाणे येथील या कुटुंबातील तीन सदस्यांनी वेगवेगळ्या पक्षातून निवडणूक लढवली होती आणि निकाल लागताच तिघांचा विजय झाल्याने राजकीय वर्तुळात या तीन उमेदवारांची चर्चा सुरू आहे.

वेगवेगळ्या पक्षातून लढवली होती निवडणूक

ठाणे महापालिकेच्या निवडणुकीत प्रल्हाद म्हात्रे हे मनसेकडून निवडणूक लढवत होते तर रेखा म्हात्रे या शिवसेनेच्या उमेदवार होत्या आणि रवी म्हात्रे हे भाजपच्या तिकिटावर जिंकून आले. पण मनसेकडून निवडून आलेले प्रल्हाद म्हात्रे यांना विजय जरी मिळाला असला तरी भाजप आणि शिंदेंची सत्ता महापालिकेत आल्याने ते नाराज झाले आहे.

ठाणे हा पारंपरिक एकनाथ शिंदे यांचा बालेकिल्ला मानला जात होता. मात्र यंदाच्या निवडणुकीत भाजप आणि शिंदेंची युतीमध्ये निवडणूक लढवण्याचे ठरवले होते. तर अजित पवारांची राष्ट्रवादी ही एकटी मैदानात उतरली होती. 131 जागांपैकी शिंदेसेनेने 87 तर भाजपला 40 जागांवर समाधान मानावे लागले. तर दुसरीकडे ठाकरे बंधू हे एकत्र ठाण्यात निवडणूक लढवत होते. मात्र या ठिकाणी त्यांचा भुईसपाट झाल्याचे दिसून आले.