महाराष्ट्र विधान परिषदेच्या 17 जागांवरून महायुतीचा जागावाटपाचा फॉर्म्युला निश्चित झाला नसताना महायुतीतील बड्या नेत्यांनी आपल्या मुलांना सेट करण्यासाठी कंबर कसलीये. आपल्या मुलांसह नातेवाईकांचे राजकीय करिअर 'सेट' करण्यासाठी सध्या शिवसेना आणि राष्ट्रवादीच्या बड्या नेत्यांची जोरदार धडपड सुरू आहे. इतकंच नव्हे तर विधान परिषदेच्या आमदारकीसाठी काही बड्या नेत्यांनी मतदारसंघही फिक्स केल्याची चर्चा सध्या पाहायला मिळतेय.

रायगडमधून भरत गोगावले मुलगा विकास गोगावलेला उमेदवारी मिळावी यासाठी आग्रही आहेत. तर राष्ट्रवादीकडून सुनील तटकरे अनिकेत तटकरेंसाठी लॉबिंग करत असल्याची चर्चा आहे...

जळगावमधून शिंदेसेनेचे गुलाबराव पाटील मुलगा प्रताप पाटलांसाठी तर किशोर पाटील मुलगा सुमित पाटीलसाठी विधानपरिषदेसाठी इच्छुक आहेत...

तसंच, परभणी-हिंगोली विधानपरिषदेतून अर्जुन खोतकर मुलगा अभिमन्यूसाठी आणि गोपीकिशन बाजोरिया हे मुलागा विप्लवला उमेदवारी मिळावी म्हणून धडपड करताना दिसतायत...

दरम्यान, विधान परिषद निवडणुकीच्या पार्श्वभूमीवर महायुती आणि इतर पक्षांमध्ये राजकीय हालचालींना वेग आला आहे. नेत्यांची आपल्या मुलांसाठीची ही धडपड पक्षातील निष्ठावान कार्यकर्त्यांसाठी मात्र चिंतेची बाब ठरताना दिसतेय. अशा पद्धतीने आजी-माजी आमदारांकडून आपल्या नातलगांसाठी लॉबिंग केली जात असेल तर निष्ठावान कार्यकर्त्यांनी करायचं काय?, असा प्रश्न यानिमित्तानं उपस्थित झालाय. त्यामुळे नेत्यांची ही धडपड पाहता आगामी विधान परिषदेच्या निवडणुकीतही घराणेशाहीची परंपरा कायम राहण्याची शक्यता आहे....