(आवेश तांदळे)

Maharashtra Corona Update:

दिवसेंदिवस राज्यातील कोरोना बाधितांची संख्या वाढत आहे. आज कोरोनाच्या १५४ नव्या रुग्णांची भर पडलीय. वाढत्या रुग्ण संख्या बघता टास्क फोर्सने खबरदारी घेण्यास सुरूवात केलीय. कोरोनाची लागण झाल्यास त्या व्यक्तीला ५ दिवस गृहविलगीकरणात ठेवण्यात येणार आहे. (Latest News)

ताप, सर्दी आणि खोकला आढळल्यास कोविड चाचणी करुन घेण्याचा सल्ला टास्क फोर्सकडून देण्यात आलाय. कोरोना झाल्यास गृह विलगीकरणात ५ दिवस राहावे. हवा खेळती राहील अशा खोलीत रहावे. इतरांना संसर्ग होऊ नये यासाठी मास्क वापरावे. घरातील ज्येष्ठ नागरिकांनी किंवा अतिजोखिम असलेल्यांनी मास्क वापरावे अशा सुचना टास्क फोर्सने दिल्यात.

दरम्यान आज जाहीर झालेल्या तर आजच्या दिवशी १७२ रुग्ण बरे होऊन घरी परतले आहेत. तर दोन रुग्णांचा कोरोनामुळे मृत्यू झालाय. दरम्यान राज्यातील कोरोनामधून बरे होणाऱ्या रुग्णांची टक्केवारी ९८.१७ टक्के आहे. तर मृत्यू दर हा १.८१ टक्के इतका आहे. कोरोनाचा नवा व्हेरियंट जेएन-१ च्या रुग्णांची संख्या १३९ झालीय. त्यामध्ये सर्वाधिक रुग्ण हे पुण्यातील आहेत. पुण्यात एकूण ९१ रुग्ण असून त्या खालोखाल नागपूरमध्ये ३० रुग्णांची नोंद झालीय. ठाण्यामध्ये ५ तर बीडमध्ये ३, छत्रपती संभाजीनगरमध्ये ३ आणि नांदेडमध्ये २ रुग्णांची नोंद करण्यात आली आहे.

कोरोनाच्या या नव्या व्हेरियंटचे रुग्ण वाढत असल्यामुळे केंद्र सरकारने आधीच राज्य आणि केंद्रशासित प्रदेशांना काळजी घेण्याचे आवाहन केलंय. केंद्रीय मंत्रालयाने जारी केलेल्या कोविड-१९ च्या नवीन मार्गदर्शक तत्त्वांचे पालन करण्यास सांगितलंय. जेएन-१ च्या वाढत्या केसेसमुळे आरोग्य आणि कुटुंब कल्याण विभागाने सर्व रुग्णालयांना इन्फ्लूएंझा सारखा आजार आणि श्वसनाच्या आजारावर लक्ष ठेवण्याचा सल्ला दिलाय.