Maharashtra Cabinet Expansion News: राज्यातील मंत्रिमंडळ विस्ताराचा तिढा कधी सुटणार असा प्रश्न अनेकांना पडला आहे. गेल्या दोन दिवसांत मुख्यमंत्री आणि दोन्ही उपमुख्यमंत्री बैठकही झाली. यातच आज उपमुख्यमंत्री अजित पवार यांनी दिल्लीला जात केंद्रीय गृहमंत्री अमित शाह यांची भेट घेतली आहे. या दोन्ही नेत्यांमध्ये तब्बल एक तास चर्चा झाली. यानंतर आता मंत्रिमंडळ विस्ताराबाबत मोठी बातमी समोर आली आहे.

सरकारनामाने दिलेल्या बातमीनुसार, मुख्यमंत्री एकनाथ शिंदे आणि उपमुख्यमंत्री देवेंद्र फडणवीसही दिल्लीला जाण्याची शक्यता आहे. मुख्यमंत्री शिंदे यांचे पुणे जिल्ह्यातील जेजुरी-मंचरचे सगळे कार्यक्रम रद्द करण्यात आले आहेत. पुढील दोन दिवसांत मंत्रिमंडळ विस्तार होऊ शकतो, यासाठीच मुख्यमंत्री शिंद यांनी आपले नियोजित कार्यक्रम रद्द केले असावे, असं बोललं जात आहे.

दोन दिवसांत खातेवाटप होणार : प्रफुल्ल पटेल

दिल्लीत अजित पवार यांच्यासोबत अमित शाह यांची भेट घेण्यासाठी गेलेले प्रफुल्ल पटेल यांनी खातेवाटप संदर्भात महत्वाची माहिती दिली आहे. पत्रकारांशी संवाद साधताना ते म्हणाले आहेत की, उद्या किंवा पर्वा म्हणजेच पुढील दोन दिवसांत खातेवाटप होईल. (Latest Marathi News)

पटेल म्हणाले आहेत की, अजित पवार सरकारमध्ये स्थापन झाल्यापासून भाजपच्या वरिष्ठ नेत्यांची भेट झाली नव्हती. त्यासाठी आम्ही आलो (दिल्लीत) आहे. ते म्हणाले, आधीची खाती ही भाजप आणि शिवसेनेकडे आहेत. कुठलं खातं काढून आम्हाला द्यायचं, नंतर त्या मंत्र्यांना कुठलं खाते द्यायचं याबाबत चर्चा सुरू आहे.

'उद्या संध्याकाळपर्यंत मंत्रीमंडळ विस्तार'

याच बाबत माहिती देताना पत्रकारांशी संवाद साधत अजित पवार गटाचे प्रदेशाध्यक्ष आणि खासदार सुनील तटकरे म्हणाले आहेत की, ''उद्या संध्याकाळपर्यंत खाते वाटप आणि मंत्रीमंडळ विस्ताराचा प्रश्न निकालात निघाल्याचे आपल्याला कळेल. आमच्यात व्यवस्थित चर्चा सुरू आहे.''