संजय जाधव, बुलढाणा प्रतिनिधी

Maharashtra Mourns Brave Son: उत्तराखंड येथील अतिउंचावरील दुर्गम भागात कर्तव्यावर असताना बुलढाणा जिल्ह्याचे सुपुत्र तथा भारतीय सैन्यदलातील हवालदार हरिदास मधुकर कापसे यांना वीरमरण आले आहे. या दुर्दैवी घटनेमुळे शेलसुरसह संपूर्ण चिखली तालुक्यावर आणि बुलढाणा जिल्ह्यावर शोककळा पसरली आहे.

हवालदार हरिदास कापसे हे मूळचे बुलढाणा जिल्ह्यातील शेलसुर येथील रहिवासी असून, सध्या त्यांचे कुटुंब चिखली शहरातील दांडे ले-आऊट येथे वास्तव्यास आहे. ते भारतीय सैन्यदलाच्या 'बॉम्बे इंजिनिअरिंग ग्रुप' (BEG) मधील '४११ (स्वतंत्र) पॅरा फील्ड कंपनी, आग्रा' येथे कार्यरत होते. सध्या त्यांची नियुक्ती उत्तराखंड राज्यातील अतिउंचावरील सीमावर्ती भागात होती.

गुरुवारी, ७ ऑगस्ट रोजी कर्तव्यावर तैनात असताना कापसे यांना अचानक मळमळ व उलटीचा त्रास सुरू झाला. त्रास जाणवू लागल्याने ते स्वतः चालत जवळील वैद्यकीय कक्षात (Medical Room) गेले. तिथे प्राथमिक उपचार घेतल्यानंतर प्रकृती सामान्य वाटल्याने ते पुन्हा सैनिकाच्या निष्ठेने आपल्या कर्तव्यावर परतले. मात्र, काही वेळातच त्यांना हृदयविकाराचा तीव्र झटका आला आणि ते अचानक खाली कोसळले.

त्यांना तातडीने पुन्हा वैद्यकीय कक्षात हलवून लष्करी डॉक्टरांनी वाचवण्याचे शर्थीचे प्रयत्न केले. मात्र, उपचारादरम्यान त्यांची प्राणज्योत मालवली. देशसेवेदरम्यान वीरमरण आलेल्या या शूर सुपुत्राला विविध क्षेत्रांतून भावपूर्ण श्रद्धांजली अर्पण केली जात आहे.