Budget 2025 : महाराष्ट्राचे उपमुख्यमंत्री आणि अर्थमंत्री अजित पवार महाराष्ट्राचा अर्थसंकल्प सादर करत आहेत. या अर्थसंकल्पामध्ये अनेक मोठ्या घोषणा अजित पवार यांनी केल्या. ते अकराव्यांदा अर्थसंकल्प सादर करत आहेत. विधानभवनामध्ये उपमुख्यमंत्री अर्थसंकल्प सादर करत आहेत. त्यांनी समृद्धी महामार्ग आणि मुंबई-पुणे महामार्गाशी संबंधित माहिती दिली.

'हिंदुहृदयसम्राट बाळासाहेब ठाकरे समृद्धी महामार्गाचे ९९ टक्के काम पूर्ण झाले आहे. त्यासाठी ६४ हजार ७५५ कोटी रुपये इतका खर्च झाला. इगतपुरी ते आमणे हा ७६ किमी लांबीचा टप्पा लवकरच वाहतुकीसाठी खुला करण्यात येईल. या महामार्गाजवळ अ‍ॅग्रो-लॉजिस्टिक हब विकसित केले जाणार आहेत. त्या ठिकाणी कोल्ड स्टोरेज, पॅकिंग तसेच निर्यात हाताळणी केंद्राच्या प्रमुख सुविधा पुरवण्यात येतील', असे उपमुख्यमंत्री म्हणाले.

'मुंबई-पुणे द्रुतगती मार्गावरील खोपोली ते खंडाळा यातील मिसिंग लिंक प्रकल्पाचे काम ऑगस्ट २०२५ पर्यंत पूर्ण होईल. परिणामी प्रवासाचा वेळ आणि इंधन या दोन्हींची बचत होऊन वाहतूक कोंडीचा प्रश्न मार्गी लागेल', अशी माहिती अजित पवार यांनी दिली. यासोबत त्यांनी मुंबई उपनगरातील प्रकल्पांवरही त्यांनी भाष्य केले.

अजित पवार म्हणाले, 'मुंबई उपनगर परिसरातील वाहतूक जलदगतीने व्हावी यासाठी वर्सोवा ते मढ खाडीपूल, वर्सोवा ते भाईंदर किनारी मार्ग, मुलुंड ते गोरेगाव, ठाणे ते बोरीवली आणि ऑरेंज गेट ते मरीन ड्राईव्ह भुयारी मार्ग असे ६४ हजार ७८३ कोटी रुपये किंमतीचे प्रकल्प हाती घेण्यात आले आहेत.' याशिवाय मुंबईमध्ये तिसरे विमानतळ होणार असल्याची घोषणा देखील त्यांनी केली. वाढवण बंदराजवळ हे विमानतळ असेल, या बंदराजवळ मुंबई-अहमदाबाद बुलेट ट्रेनचे स्टेशनदेखील असणार आहे.