सागर आव्हाड, पुणे|ता. ९ एप्रिल २०२४

Varandha Ghat Closed:

एक महत्वाची बातमी. पुण्याहून भोरमार्गे महाडला जाणाऱ्या वरंध घाट मार्गावरची सर्व प्रकारची वाहतूक 30 मे पर्यंत बंद राहणार आहे. वरंध घाटातील रायगड जिल्ह्याच्या हद्दीतील 21 किलोमीटर लांबीच्या रस्त्याची कामे करण्यात येणार असल्याने हा मार्ग बंद राहणार असल्याचे सांगण्यात आले आहे.

याबाबत सविस्तर माहिती अशी की, पुण्याहून भोरमार्गे महाडला जाणाऱ्या वरंध घाट मार्गावरची सर्व प्रकारची वाहतूक 30 मे पर्यंत बंद राहणार आहे. वरंध घाटातील रायगड जिल्ह्याच्या हद्दीतील २१ किलोमीटर लांबीच्या रस्त्याची कामं करण्यात येणार आहेत. यामध्ये वरंध घाटात रस्त्याचे दुपदरीकरण, संरक्षक भिंत बांधणे तसेच आवश्यक सुरक्षा उपाययोजना करण्याची कामे सुरू आहेत.

ही कामे सुरू असताना अपघात होण्याची शक्यता असल्यामुळे सुरक्षिततेच्या कारणास्तव वाहतूक बंद ठेवण्याचा निर्णय घेण्यात आला आहे. रायगड जिल्हाधिकारी कार्यालयाने हे आदेश काढलेत. रायगड जिल्हाधिकारी कार्यालयाने घाट बंद ठेवण्याबाबत रायगडच्या पोलीस अधीक्षकांना आणि राष्ट्रीय महामार्ग विभाग यांना अभिप्राय मागितला होता.

त्यानुसार त्यांनी हा रस्ता बंद करण्यास हरकत नाही असा अभिप्राय दिल्यानंतर हा निर्णय घेण्यात आला आहे. त्यामुळे महाड, कोकणकडे जाणाऱ्या प्रवाश्यांनी ताम्हिणी घाट, अंबेनळी घाट या पर्यायी मार्गांचा अवलंब करावा असे आवाहन रायगड जिल्हाधिकारी कार्यालयाकडून करण्यात आले आहे.

 ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)