Bal Sangopan Yojana fund delay in Maharashtra : बालसंगोपन योजनेचा निधी 'लाडकी बहीण' योजनेकडे वळवल्यामुळे राज्यातील अनाथ मुलांना वर्षभरापासून सरकारी मदत मिळाली नाही. एकट्या सोलापुरातील १४ हजार अनाथ मुले वर्षभरापासून मदतीपासून वंचित असल्याचे समोर आले आहे.

राज्यातील अनाथ आणि निराश्रित चिमुकल्यांच्या हक्काचा 'बालसंगोपन योजनेचा' निधी गेल्या एक वर्षापासून रखडल्याची धक्कादायक माहिती समोर आली आहे. शासनाकडून वेळेवर अर्थसाहाय्य न मिळाल्यामुळे हजारो मुलांचे भवितव्य आता टांगणीला लागले आहे. एकट्या सोलापूर जिल्ह्यातील जवळपास १४ हजार विद्यार्थ्यांना गेल्या एक वर्षापासून या योजनेचा कोणताही लाभ मिळालेला नाही.

सोलापूर जिल्ह्यात बालसंगोपन योजनेचे १३ हजार ८४२ लाभार्थी आहेत. त्यांना शासनाकडून दरमहा २,२५० रुपये दिले जातात. तर, कोरोनात अनाथ झालेली सोलापूर जिल्ह्यातील १,२६० चिमुकली आहेत. त्यांना दरमहा चार हजार रुपये मिळतात. मात्र, या चिमुकल्यांना एक वर्ष झाले तरीदेखील शासनाचे अर्थसहाय्य मिळालेले नाही. बालसंगोपन योजनेचा निधी मुख्यमंत्री माझी लाडकी बहीण योजनेकडे वळविल्याने राज्यातील पावणेदोन लाख लाभार्थी वर्षभरापासून मदतीविना असल्याचे विश्वसनीय सूत्रांनी सांगितले.

'लाडकी बहीण' योजनेकडे निधी वळवल्याची चर्चा

या संपूर्ण प्रकरणात अत्यंत धक्कादायक बाब म्हणजे, बालसंगोपन योजनेचा हा हक्काचा निधी 'मुख्यमंत्री माझी लाडकी बहीण' योजनेकडे वळवण्यात आल्याची राजकीय व प्रशासकीय वर्तुळात जोरदार चर्चा सुरू आहे. या निधीच्या कमतरतेमुळे कोरोना महामारीच्या काळात अनाथ झालेली निष्पाप मुलेही आता सरकारी मदतीपासून वंचित राहिली आहेत.

लाभार्थी पालकांमध्ये तीव्र संताप

आपल्या हक्काच्या पैशांसाठी आणि मुलांच्या संगोपनासाठी लाभार्थी कुटुंब आणि त्यांचे नातेवाईक गेल्या अनेक महिन्यांपासून शासकीय कार्यालयांचे उंबरठे झिजवत आहेत. मात्र, प्रशासनाकडून केवळ पोकळ आश्वासने दिली जात असल्याने लाभार्थ्यांमध्ये तीव्र संताप व्यक्त केला जात आहे. अनाथ आणि गरजू मुलांच्या भविष्याशी खेळणाऱ्या या उदासीन कारभारावर आता सर्वच स्तरातून टीका होत आहे.