अमर घटारे, अमरावती|ता. ९ ऑगस्ट २०२४

राज्यात विधानसभा निवडणुका अवघ्या काही दिवसांवर आल्याने महायुती- महाविकास आघाडीमध्ये मोर्चेबांधणी सुरू झाली आहे. विधानसभेच्या रणनितीसाठी मुख्यमंत्री एकनाथ शिंदे, देवेंद्र फडणवीस आणि अजित पवार यांच्यात जोर-बैठका सुरू असतानाच महायुतीला मोठा धक्का बसण्याची शक्यता आहे. आज प्रहार संघटनेचे नेते, आमदार बच्चू कडू हे महायुतीमधून बाहेर पडून तिसऱ्या आघाडीची घोषणा करण्याची शक्यता आहे.

याबाबत सविस्तर माहिती अशी की, प्रहार संघटनेचे नेते आणि आमदार बच्चू कडू हे मोठा निर्णय घेण्याची शक्यता आहे. आज छत्रपती संभाजीनगर येथे बच्चू कडू भव्य मोर्चा काढणार आहेत. या मोर्चामधून ते महायुतीतून बाहेर पडून तिसऱ्या आघाडीची घोषणा करण्याची शक्यता वर्तवली जात आहे. गेल्या काही दिवसांपासून बच्चू कडू यांनी तिसरी आघाडी काढण्याबाबत सूचक संकेतही दिले आहेत.

त्यामुळे आज बच्चू कडू छत्रपती संभाजीनगर येथील मोर्चातून तिसऱ्या आघाडीची घोषणा करणार का? याकडे राजकीय वर्तुळाचे लक्ष लागले आहे. काही दिवसांपूर्वीच बच्चू कडू यांनी शेतकऱ्यांची तिसरी आघाडी काढण्याबाबत विधान केले होते. तसेच आमच्या मागण्या मान्य झाल्यास आम्ही विधानसभेतून माघार घेऊ, असेही ते म्हणाले होते.

त्यामुळे आज बच्चू कडू हे तिसऱ्या आघाडीबाबत काय निर्णय घेणार? याकडे राजकीय वर्तुळाचे लक्ष लागले आहे. बच्चू कडू यांनी तिसऱ्या आघाडीची घोषणा केल्यास महायुतीच्या अडचणी वाढण्याची शक्यता आहे तसेच महाविकास आघाडीचेही गणित बदलण्याची शक्यता आहे. त्यामुळे आगामी विधानसभेच्या दृष्टीने बच्चू कडू काय निर्णय घेणार? हे पाहणे महत्वाचे ठरणार आहे.