उपमुख्यमंत्री आणि अर्थमंत्री अजित पवार यांनी आज राज्याचा वर्ष २०२५-२६ चा अर्थसंकल्प सादर केला. नव्याने सत्तेवर आलेल्या महायुती सरकारचा हा पहिला अर्थसंकल्प आहे. अर्थमंत्री म्हणून अजित पवार यांनी ११ वा अर्थसंकल्प सादर केला. यावेळी अजित पवारांनी मुंबई, पुणे, नागपूर या शहरांना अधिक प्रगतीवर नेण्यासाठी मोठ्या घोषणा केल्या. या शहरांमध्ये येत्या पाच वर्षात मुंबई, नागपूर, पुण्यात नवीन मेट्रो मार्ग कार्यान्वित करण्यात येणार असल्याची घोषणा अर्थमंत्री अजित पवार यांनी केली.

मुंबई, नागपूर आणि पुणे महानगरांतील नागरिकांना पर्यावरणपूरक, शाश्वत, विनाअडथळा वाहतूक सुविधा उपलब्ध देण्यात येणार आहे. या शहरांमध्ये एकूण १४३.५७ किलोमीटर लांबीचे मेट्रो मार्ग कार्यान्वित करण्यात आलेत. या सेवेचा लाभ सुमारे १० लाख प्रवासी रोज घेत आहेत. येत्या वर्षात मुंबईमध्ये ४१.२ किलोमीटर तर पुण्यामध्ये २३.२ किलोमीटर असे एकूण ६४.४ किलोमीटर लांबीचे मेट्रो मार्ग सुरू होणार आहेत.

ठाणे वर्तुळाकार मेट्रो मार्ग तसेच पुण्यातील स्वारगेट ते कात्रज विस्तार मार्गिका प्रकल्पास केंद्र शासनाने मान्यता दिलीय. पुणे मेट्रो रेल्वे टप्पा-२ अंतर्गत खडकवासला - स्वारगेट - हडपसर - खराडी आणि नळ स्टॉप - वारजे - माणिकबाग या दोन मार्गिकांचा ९ हजार ८९७ कोटी रुपये किंमतीचा प्रस्ताव केंद्र शासनाच्या मान्यतेसाठी पाठवलाय. नागपूर मेट्रोचा पहिला ४० किमीचा टप्पा पूर्ण झालाय. ठाणे मेट्रो, पुणे मेट्रोच्या विस्तारीकरणाला मंजुरी देण्यात आल्याची माहिती अजित पवार अर्थसंकल्प मांडताना दिली.

मुंबईतील छत्रपती शिवाजी महाराज आंतरराष्ट्रीय विमानतळ ते नवी मुंबई आंतरराष्ट्रीय विमानतळ या मेट्रो मार्गाचे काम लवकरच हाती घेण्यात येणार आहे. मुंबई उप-नगरातील वाहतुकीचा वेग ​वाढवण्यासाठी वर्सोवा ते भाईंदर, मुलूंड ते गोरेगाव, ठाणे ते बोरिवली, ऑरेंज गेट ते मरीन ड्राइव्ह याठिकाणी भुयारी मार्गाचे काम हाती घेण्यात आल्याची माहितीही अजित पवारांनी दिलीय.