तबरेज शेख..

Nashik: नाशिक शहरासह ग्रामीण भागात सध्या बिबट्याचा मोठ्या प्रमाणात वावर आहे. त्यामुळे नागरिकांमध्ये भितीचे वातावरण पसरले आहे. नागरी वस्तीमध्ये बिबट्याचा मुक्त संचार पाहायला मिळत असल्याने नागरिकांकडून चिंता व्यक्त केली जात आहे. तसेच बिबट्याचा बंदोबस्त करण्याचीही मागणी होताना दिसत आहे.

सध्या सोशल मीडियावर एका मांजराचा आणि बिबट्याचा व्हिडिओ जोरदार व्हायरल होत असून हे दोन्ही प्राणी विहरीत पडल्याचे पाहायला मिळत आहे. (Nashik News Update)

समोर आलेल्या माहितीनुसार, मांजरीमागे लागलेला बिबट्या आणि जीव वाचवण्यासाठी धावत असलेली मांजर हे दोघे विहरीत पडले होते. सिन्नर तालुक्यातील तेंबुरवाडी,आशापूरमध्ये ही घटना घडली आहे. भक्षच्या शोधात असलेल्या बिबट्याने मांजरीवर झडप घातली होती. झडप घालत असतांना जवळच विहीर होती.

मात्र अंधारात ही बाब लक्षात न आल्याने मांजरीसह बिबट्या विहिरीत पडला. आज पहाटेच्या वेळेला हा संपूर्ण प्रकार घडला आहे. सध्या या मांजरीचा आणि बिबट्याचा व्हिडिओ सोशल मीडियावर चांगलाच व्हायरल होत आहे.

घटनेची माहिती मिळताच आजू बाजूच्या परिसरातील नागरिकांनी बिबट्याला पाहण्यासाठी मोठी गर्दी केली होती. मांजर आणि बिबट्या दोघे देखील विहिरीत पाणी जास्त असल्याने जीव वाचवण्यासाठी धडपड करत होते. विहिरीत असलेल्या लोखंडी अँगलचा आधार घेऊन बिबट्या आपला जीव वाचवून बसल्याचे दिसून आले.

तर बिबट्यासोबत विहिरीत पडलेली मांजर देखील विहिरीचा कोपरा शोधून आपला जीव वाचवण्यासाठी प्रयत्न करत असल्याचे दिसून आले. पाण्यामध्ये दोघांमध्ये चांगलीच जुगलबंदी सुरू असल्याचेही व्हिडिओमध्ये पाहायला मिळत आहे.

दरम्यान याबाबत तात्काळ वन विभागाच्या माहिती देण्यात आली त्यांनतर वन विभागाचे अधिकारी आणि कर्मचारी घटनास्थळी दाखल झाले.

त्यांनी अथक प्रयत्न करून विहिरीत पडलेला बिबट्या आणि मांजर या दोघांचे प्राण बचावले आहेत. विहिरीत पडलेल्या बिबट्याला वनविभागाच्या पिंजऱ्यातून घेऊन जाण्यात आले त्यांनतर त्याला नैसर्गिक अधिवासात सोडून देण्यात येणार आहे. (Viral Video)