भूषण अहिरे, साम टीव्ही

धुळे: मानवी मेंदूवर घातक परिणाम करणाऱ्या गांजाची बेकायदेशीर वाहतूक करणाऱ्या आंतरजिल्हा टोळीचा स्थानिक गुन्हे अन्वेषण विभागाच्या (LCB) पथकाने पर्दाफाश केला आहे. धुळ्याहून शिरपूरकडे मारुती सुझुकी कारमधून घेऊन जाण्यात येणारा तब्बल १६ किलो गांजा पोलिसांनी जप्त केला असून, या प्रकरणी दोन आरोपींच्या मुसक्या आवळल्या आहेत. या कारवाईत गांजा आणि वाहनासह एकूण ९ लाख १२ हजार रुपयांचा मुद्देमाल हस्तगत करण्यात आला आहे.

स्थानिक गुन्हे अन्वेषण विभागाच्या अधिकाऱ्यांना त्यांच्या गुप्त माहितीदाराकडून एक महत्त्वपूर्ण माहिती मिळाली होती. एका मारुती सुझुकी कारमधून धुळ्याकडून शिरपूरच्या दिशेने मोठ्या प्रमाणावर गांजाची वाहतूक केली जाणार असल्याचे या माहितीवरून स्पष्ट झाले होते. माहिती मिळताच एलसीबीच्या अधिकाऱ्यांनी वेळ न घालवता तात्काळ एक विशेष पथक संबंधित मार्गावर रवाना केले.

१६ किलो गांजासह दोघे ताब्यात, मुख्य विक्रेता फरार

पथकाने धुळे-शिरपूर महामार्गावर सापळा रचून संशयास्पद मारुती सुझुकी कार अडवली. कारची झडती घेतली असता, पोलिसांना त्यात तब्बल १६ किलो गांजा आढळून आला. पोलिसांनी कारमधील दोन इसमांना ताब्यात घेऊन त्यांची कसून चौकशी केली. या चौकशी दरम्यान हा गांजा धुळे शहरातीलच एका नामांकित इसमाकडून विकत घेण्यात आल्याची कबुली आरोपींनी दिली आहे. पोलिसांची कारवाई झाल्याचे समजताच धुळ्यातील संबंधित मुख्य गांजा विक्रेता सध्या फरार झाला असून, पोलीस त्याचा शोध घेत आहेत.

एलसीबीने जप्त केलेला गांजा, गुन्ह्यात वापरलेले वाहन आणि इतर साहित्याची एकूण किंमत अंदाजे ९ लाख १२ हजार रुपये आहे. अटक करण्यात आलेल्या दोन्ही आरोपींविरोधात अंमली पदार्थ विरोधी कायद्यान्वर्गत (NDPS Act) गुन्हा दाखल करण्यात आला असून, या रॅकेटमध्ये आणखी कोणाचा सहभाग आहे का, याचा पुढील तपास स्थानिक गुन्हे अन्वेषण विभाग करत आहे.