संदीप भोसले, साम टीव्ही

लातूर: जिल्ह्यातील रेणापूर तालुक्यात एक धक्कादायक घटना घडली आली आहे. प्रेमप्रकरणातून सुरू झालेल्या वादानंतर इंस्टाग्रामवरून येत असलेल्या धमक्या आणि मानसिक तणावाला कंटाळून एका २४ वर्षीय तरुणाने गळफास घेत आत्महत्या केली आहे. तेजस घोडके असं या तरूणाचं नाव असून आत्महत्यापूर्वी सुसाईड नोट लिहित त्याने आत्महत्येचं कारण सांगितलं. रेणापूर तालुक्यातील मोरवड येथील हा तरुण आहे. या घटनेमुळे परिसरात खळबळ उडाली आहे.

मिळालेल्या माहितीनुसार, संबंधित तरुणाचे एका युवतीसोबत प्रेमसंबंध होते. काही दिवसांपासून दोघांमध्ये वाद सुरू होता. यानंतर सोशल मीडियावरून धमक्या देणे, बदनामी करण्याची भीती दाखवणे आणि सतत मानसिक दबाव टाकला जात असल्याचा आरोप स्वतः तेजस याने सुसाईड नोटमध्ये लिहून केला होता. या सर्वाला कंटाळून त्याने आत्महत्या केली असल्याचे सांगितले जात आहे.

घटनेची माहिती मिळताच रेणापूर पोलिसांनी घटनास्थळी धाव घेत पंचनामा केला. मृतदेह शवविच्छेदनासाठी शासकीय रुग्णालयात पाठवण्यात आला आहे. दरम्यान, आत्महत्येमागील नेमके कारण काय, सोशल मीडियावरील धमक्या कितपत गंभीर होत्या आणि या प्रकरणात आणखी कोणाचा सहभाग आहे का, याचा तपास पोलीस करत आहेत. कुटुंबीयांनी संबंधितांवर कठोर कारवाईची मागणी केली आहे. या घटनेमुळे सोशल मीडियावरील वाद आणि मानसिक तणाव किती गंभीर स्वरूप धारण करू शकतो, याची पुन्हा एकदा चर्चा सुरू झाली आहे.