संदीप भोसले, लातूर

राज्यात येत्या १५ जानेवारीला महापालिकेच्या निवडणुका घेण्यात येणार असून यासाठी अनेक नेत्यांनी कामाला सुरुवात केली आहे. पक्षांचे जागावाटप झाले असून आज दुपारी ३ वाजेपर्यंत उमेदवारांना आपला एबी फॉर्म भरता येणार आहे. बऱ्याच पक्षातील जुने नेते, कार्यकर्ते हे उमेदवारीची संधी न मिळाल्यामुळे नाराज आहेत. वर्षानुवर्षे कामे करूनही नेते मंडळींना उमेदवारी न दिल्याने नेते मंडळींनी निदर्शने केलेली पाहायला मिळत आहे. अशातच पक्षाकडून उमेदवारी न मिळाल्याने भाजपाच्या लातूर शहर संघटनातील संघटन सरचिटणीस निखिल गायकवाड यांनी आपल्या पदाचा राजीनामा दिला आहे.

लातूर महापालिकेसाठी उमेदवारी दाखल करण्यासाठी अगदी काही तास शिल्लक असताना भाजपातील नाराजी नाट्याला सुरुवात झाली आहे. भाजपाच्या लातूर शहर संघटनातील संघटन सरचिटणीस निखिल गायकवाड यांनी पदाचा राजीनामा दिला. “काम करण्याचे फळ मिळाले, धन्यवाद” अशी भावनिक पोस्ट सोशल मीडियावर टाकत राजीनामा दिल्याची माहिती समोर आली आहे.

पक्षाकडून अचानक उमेदवारी न मिळाल्याने हा राजीनामा देण्यात आल्याची चर्चा आहे. निखिल गायकवाड हे भाजपाचे जुने व सक्रिय कार्यकर्ते म्हणून कार्यरत होते. मात्र महापालिकेच्या तोंडावर इतर राजकीय पक्षांमधून मोठ्या प्रमाणात नेते आणि कार्यकर्ते भाजपात दाखल झाल्याने, जुन्या कार्यकर्त्यांमध्ये आता नाराजीचे सूर उमटत आहेत. दरम्यान आता या नाराजी नाट्यानंतर महापालिकेच्या खुर्चीवर कोणाचा शिलेदार बसणार हे पाहणं महत्त्वाचं ठरेल.