Crime News: अकोला येथून एक मोठी बातमी समोर आली आहे. जुन्या वादातून एका तरुणाची धारदार शस्त्राने निर्घृण हत्या करण्यात आली आहे. भर रस्त्यात या तरुणावर हल्ला करण्यात आला आहे. या हल्ल्यात आणखी एक तरुण गंभीर जखमी असल्याची माहिती मिळाली आहे. (Latest Marathi News)

मिळालेल्या अधिक माहितीनुसार, सिव्हील लाईन पोलिस स्टेशनच्या हद्दीतील चिखलपुरा परिसरात ही धक्कादायक घटना घडली आहे. आकाश वाकोडे असं मृत मुलाचं नाव आहे. पाच ते सहा मुलं काल रात्री त्याच्या अंगावर धावून आले. यावेळी आकाश आपल्या मित्रासह रस्त्यावर उभा होता. आपल्यावर अशापद्धतीने हल्ला होईल याची त्याला काहीच कल्पना नव्हती.

पप्पू विनोद टोबरे असं हल्लेखोराचं नाव आहे. या तरुणासह आणखीन ५ ते ६ मुलांनी आकाशवर तलवारीने सपासप वार केले. यावेळी त्याला वाचवण्यासाठी गेलेल्या मित्रावर देखील तरुणांच्या टोळक्याने वार केले. सुदैवाने आकाशचा मित्र यात बचावला आहे. मात्र त्याची प्रकृती चिंताजनक असून त्याच्यावर जवळच्या रुग्णालयात उपचार सुरू आहेत.

जुना वाद काय होता?

वर्षभरापूर्वी चिखलपुरा भागात सुहास वाकोडे आणि आकाश यांनी पप्पू विनोद टोबरे याच्यावर हल्ला केला होता. या वादातून पप्पू विनोद टोबरे याच्यासह पाच ते सहा जणांनी धारदार तलवारीने चिखलपुरा रोडवर उभ्या असलेल्या आकाश वाकोडे युवकावर हल्ला चढवला. धारदार तलवारीचे अनेक घाव आकाशच्या शरीरावर घातल्यामुळे आकाश वाकोडे याचा जागीच मृत्यू झाला तर या हल्ल्यात एक जण गंभीर जखमी असल्याची माहिती आहे.

दरम्यान, या पोलिसांना या घटनेची माहिती मिळताच अकोला सिव्हील लाईन पोलीस (Police) स्टेशनचे पोलीस निरीक्षक भाऊराव घुगे यांच्यासह पोलीस घटनास्थळी दाखल झाले होते. याप्रकरणी दोघांना पोलिसानी ताब्यात घेतल्याची माहिती असून इतर आरोपींचा पोलिस शोध घेत आहेत. रात्री उशिरा याप्रकरणी गुन्हा दाखल करण्याची प्रक्रिया सुरू होती.