सांगली: लता मंगेशकर  आणि त्यांच्या पाचही भावंडांचं बालपण सांगली शहरातच गेले हे विशेष. तब्बल १४ वर्ष  लतादीदी आणि त्यांचे संपुर्ण मंगेशकर कुटुंबीय सांगली बस स्थानका नजीक असणाऱ्या एका वाड्यात राहत होतं. लतादीदींचे वडील दिनानाथ मंगेशकर यांनी  त्यांच्या 'बळवंत सिनेटोन' कंपनी चा स्टुडिओ सांगलीच्या गणपती मंदिर परिसरात उभा केला होता. याशिवाय अनेक संगीत नाटकं, काही सिनेमे यांची निर्मिती देखील सांगली मधेच केली होती.  मंगेशकर कुटूंबियांचे घर असणाऱ्या गावभाग परिसरातील घराला त्याकाळी मंगेशकर चाळ म्हणून ओळखले जायचे. लता मंगेशकर थोडेफार दिवस ज्या शाळेत शिकल्या ती शाळा मारुती चौकातील मुरलीधर मंदिराच्या जवळ होती. महापालिकेच्या मुलींची शाळा क्रमांक ११ मध्ये लता मंगेशकर शाळेत गेल्या होत्या हे आणखी एक विशेष बाब.

लता मंगेशकर यांच्या सांगलीतील लहानपणीच्या आणि मंगेशकर कुटुंबाच्या वास्तव्याबद्दलच्या त्या आठवणीना सांगली शहरातील ज्येष्ठ व्यापारी अरुण दांडेकर यांनी उजाळा दिला. लता शाळेला गेली की आशा घरी दंगा फार करत असे. त्यामुळे एक दिवस लतांबरोबर आशाला शाळेत सोडण्यात आले. पण आशाने शाळेतही खोडकरपणा केला त्यामुळे आशा बरोबर लताला देखील घरी पाठवण्यात आले. या घटनेनंतर लता पुन्हा सांगलीतील या शाळेत गेल्या नाही. असे दांडेकर यांनी त्यांच्या आठवणी सांगितल्या.

आणखी एक विशेष बाब म्हणजे, लता मंगेशकर यांच्या नंतरच्या आशा, उषा आणि हृदयनाथ मंगेशकर या तीन भावंडांचा जन्म सांगलीतला. मंगेशकर कुटुंबियांचे संगीत क्षेत्रात असणारे योगदान लक्षात घेत सांगली नगरपालिकेने शहरात दीनानाथ मंगेशकर यांच्या नावाने एक नाटयगृह सुरू केले. लता मंगेशकर हरिपूर रोडवरील बागेतल्या गणपतीच्या भक्त होत्या. लता मंगेशकर यांनी आपल्या कुटुंबासमवेत सांगली सोडल्यानंतर त्या पुन्हा सांगलीत ज्यावेळी आल्या त्यावेळी त्यांनी आवर्जून हरिपूर रोडवरील बागेतल्या गणपती मंदिरात गणपती बाप्पांचे दर्शनासाठी जात असत. सांगली महापालिकेच्या वतीने २००० साली मंगेशकर भावंडांचा एक सत्कार सोहळा आयोजित करण्यात आला होता. पालिकेच्या वतीने लता मंगेशकर, आशा भोसले, हृदयनाथ मंगेशकर यासह पाच भावंडांचा सोन्याचे मानपत्र देऊन सत्कार करण्यात आला होता.

Edited By: Pravin Dhamale